Roman Sklıar Arystaǵy qurylys jumystarynyń barysymen tanysty

ARYS. QazAqparat - QR Premer-Mınıstriniń orynbasary Roman Sklıar Arys qalasyndaǵy turǵyn úıler men nysandardy qalpyna keltirý jumystarynyń barysyn tekserip, Túrkistan qalasynyń ákimshilik, tarıhı-mádenı, áleýmettik mańyzdaǵy nysandarynyń qurylys alańdaryn aralady.

Bul týraly Túrkistan oblysy ákimdiginiń baspasóz qyzmeti habarlaıdy.

Jumysshy top Túrkistan oblysynyń ákimi Ómirzaq Shókeevpen birge aldymen qaıyrymdylyq qordyń qarajatyna salynǵan turmysy tómen otbasylarǵa arnalǵan 50 úıden turatyn jańa shaǵyn aýdannyń qurylys barysymen tanysty.

Jańa úıler aıaqtalý satysynda tur, ishki árleý jumystary jáne úı jabdyqtaryn ornatý jumystary júrgizilýde. Jańa qurylys alańynda qajetti ınfraqurylymnyń qurylysy qatar júrgizilip, aldaǵy ýaqytta munda mektep, balabaqsha ǵımarattaryn turǵyzý kózdelgen. Kelesi kezekte Úkimet basshysynyń orynbasary Nur-Sultan qalasyna bekitilgen 9-sektordyń qurylys alańyn aralap shyǵyp, qaıta salynǵan jeke úılerge kirip, olardyń ıelerimen áńgimelesti.

Munda basym bóligi jer úıler men 50-den astam kópqabatty turǵyn úılerden turatyn 700-ge jýyq nysan boı kótergen. Qurylysshylarmen kezdesken Roman Sklıar Nur-Sultan qalasyna bekitilgen qurylys qarqynyn jyldamdatýdy, bekitilgen kesteden keshikpeı, qujattandyrý jumystaryn shuǵyl arada tolyqtaı ótkizýdi tapsyrdy. Jumysshy top Arys qalasynda jınalys ótkizip, qurylys barysy men naqty atqarylǵan jumys nátıjelerin talqylady. Arysta barlyǵy 68 áleýmettik nysan ornalasqan (bilim berý, densaýlyq saqtaý jáne sport mekemeleri), olardyń 64-i – kúrdeli jóndeýdi jáne 4-eýi – tolyqtaı qalpyna keltirýdi talap etti.

Sondaı-aq QR Úkimet basshysynyń orynbasary Túrkistan qalasyndaǵy qazany qaınaǵan qurylys jumystarynyń barysymen tanysyp, ákimdik, medıa ortalyq, «Nur-Sultan» alańyn, Tuńǵysh Prezıdent saıabaǵy, halyqqa qyzmet kórsetý ortalyǵynyń ǵımaratyn, mýzyka mektebin, sonymen qatar attraktsıondary bar qalalyq saıabaqtyń qurylys jumystaryn aralap kórdi.

Jumys sapary barysynda QR Premer-Mınıstriniń orynbasary Roman Sklıarǵa Túrkistan qalasyn salýdyń Bas jospary kórsetilip, jańadan boı kóteretin mádenı-rýhanı ortalyqtyń jobasy tanystyryldy. Biregeı jobaǵa AQSh -ń SOM – (Skidmore, Owings and Merrill) arhıtektýralyq bıýrosy jumyldyrylǵan. Álemdik deńgeıdegi sáýlettik bıýrosy dúnıejúzindegi eń bıik, qaıtalanbas ǵımarattardyń jobalaryn jasaǵan.