Robot polıtseıler Sıngapýr áýejaıyn patrýldep júr
Bul - Sıngapýr polıtsııasy bes jyldan astam ýaqyt synaqtan ótkizip, Changı áýejaıyn patrýldeýge jibergen eki robot.
Olar aldaǵy jyldary ofıtserlerge kómektesý úshin qala-memlekettiń kóshelerin patrýldeıdi dep josparlanyp otyr.
Sáýir aıynan beri áýejaıda patrýldik qyzmet atqarǵan robottar polıtsııanyń jergilikti jerdegi «kózi men qulaǵyna» aınalǵan.
Bir jaǵdaı bolǵanda robottar sol jerdi qorshap, polıtsııanyń kelýin kútedi jáne jarq-jurq etip, sırena men dınamıktiń kómegimen aınaladaǵy adamdarǵa eskertý jasaı alady.
Adamdar robottyń aldyńǵy jaǵyndaǵy túımeni basyp, polıtsııamen tikeleı baılanysa alady.
Sıngapýr polıtsııasy juma kúni qala shtatynda robottar birtindep kóbeıedi dep málimdedi.
«Robototehnıkany iske qosý - aldyńǵy qatardaǵy qyzmetkerlerimizdiń operatsııalyq tıimdiligi men múmkindikterin jaqsartady, olardyń óz mindetterin durys oryndaýyna jaǵdaı jasaıdy», - deıdi áýejaı polıtsııasynyń bastyǵy jáne operatsııalyq ofıtser Lım Ke Veı.
Ár robotta aýdıohabarlama taratatyn kiristirilgen dınamık jáne kórneki habardy kórsetetin panel bar.
Bıiktigi - shamamen 1,7 metr (5,5 fýt), biraq barynsha uzartqanda 2,3 metrge (7,5 fýt) deıin jetedi.
Sondaı-aq olar 360 gradýstyq birneshe kameramen jabdyqtalǵan, bul áýejaı polıtsııasyna aǵymdaǵy jaǵdaıdy basqarý úshin «kedergisiz kórinis» alýǵa múmkindik beredi.
Bul - 5 mln astam halqy bar, tehnologııany jaqsy meńgergen elde azamattyq mindetterge qoldanylatyn sońǵy úlgidegi robottar.
Robottyń burynǵy nusqalary 2018 jáne 2022 jyldary qoǵamdyq sherýde qoldanylǵan.
Koronavırýs kezinde robot-ıtter áleýmettik qashyqtyqty qatań saqtaýǵa kómek berdi, al tazalap-jınaýshy robottar búkil eldegi metro stansalarynda, sondaı-aq áýejaılarda kóz úırengen kóriniske aınaldy.
Sonymen qatar, kólik qyzmetkerleri ushatyn taksıler bar bolǵany eki jyldan keıin shyndyqqa aınalady dep úmittenip otyr.
Biraq robottar salystyrmaly túrde keń taraǵan elde de halyqtyń jańa kelgen «polıtsııa qyzmetkerlerine» úırenýine biraz ýaqyt qajet bolýy múmkin.