«Rıo-2016» Olımpıadasyna Qazaqstan quramasynyń sporttyq kıimi daıyndalýda

ASTANA. QazAqparat - «Rıo-2016» Olımpıadasyna arnalǵan Qazaqstan quramasy sporttyq kıimderiniń syzbalary kelesi jyly 20 qańtarda daıyn bolmaq. Bul týraly búgin Ortalyq kommýnıkatsııalar qyzmetinde ótken baspasóz máslıhatynda Sporttyq rezervtiń ulttyq shtattyq komandalar dırektsııasynyń basshysy Qaıyrgeldi Janpeıisov málim etti.

«Biz qazaqstandyq sportshylarǵa paradtyq jáne sporttyq kıimderdi tigetin otandyq óndirýshilermen kezdestik. Ázirge syzbasyn jasaý jumystary jalǵasýda. Ol 20 qańtarǵa deıin jalǵasady. Sodan keıin biz sportshylardyń sporttyq kıimderiniń úlgilerin qaraıtyn arnaıy komıssııa quramyz», - deıdi ol.

Óz kezeginde QR Mádenıet jáne sport vıtse-mınıstri Sáken Musaıbekov otandyq sportshylarǵa arnaıy sporttyq kıimderdi jergilikti kompanııalar tigetindigin habarlady. «Memleket basshysynyń Joldaýynda aıtylǵanyndaı, bizdiń elde paradtyq jáne sporttyq kıimderdi tigetin jaqsy tigin fabrıkalary bar. Sondyqtan, biz ózimizdiń qazaqstandyq óndirýshilerdi tańdaımyz», - dedi vıtse-mınıstr.