Rınat Mýhın Azıadadaǵy jeńisinen keıingi áserimen bólisti
«Ózderińiz kórgendeı, men óz myqtylyǵymdy dáleldedim. Bunyń barlyǵy qajyrly eńbektiń nátıjesi. Men jarysqa shyǵar aldynda sál qobaljyǵanym ras. Alaıda, qandaı jaǵdaı bolmasyn jeńiske jetýim kerek dep oıladym. Aqyry oılaǵanym oryndaldy. Mine, birinshi bolyp el qorjynyna altyn júldeni saldym. Bul basqa sportshylarymyzǵa da demeý bolatyny sózsiz. Maǵan qoldaý bildirgenderińizge, senim artqandaryńyzǵa rahmet»,- dedi jarystan keıin Rınat Mýhın.
Qazaqstan quramasyna alǵashqy altyn medaldi syılaǵan chempıonymyz jeńisinen keıingi áserinde qolaısyz aýa raıynyń jeńiske jetýine áser etpegenin de aıtty, dep habarlaıdy Sapporodan QazAqparat tilshisi.
"Búgin men jarysqa shyǵatyn kúni Sapporonyń aýa raıy tosyn minez tanytyp, qarly boranǵa basty. Biraq, bul meniń jeńiske jetýime keri áserin tıgize almady", dedi chempıon.
Búgin Sapporo qalasynda qatty jel turyp, túnimen jaýǵan ulpa qar ushqyndary keıbir sportshylarǵa qıyndyq ákelip jatqany anyq. Alaıda, bizdiń shańǵyshymyz 15 shaqyrymdyq qashyqtyqty aýa raıynyń qolaısyzdyǵyna qaramastan birinshi bolyp basyp ótti.
Esterińizge sala keteıik, keshe Elena Kolomına kúmis júldeni jeńip alsa, búgin ol taǵy bir qolany el qorjynyna salǵan bolatyn.
Búgin qazaqstandyq sportshylar kerlıng, shańǵy jarystary, tramplınnen sekirý, konkıı sporty, short-trek, shaıbaly hokkeıden óner kórsetip jatyr.
foto:Іzturǵan Aldaýev