Rımde «Qazaqstan Respýblıkasynyń zańnamalary men ınstıtýttary» konferentsııasy ótti
7 qazan kúni ótken is-sharaǵa Italııa Parlamentiniń depýtattary, ınstıtýtsıonaldy organnyń ókilderi, belgili ǵalym-quqyqtanýshylar, saıasatkerler men sarapshylar, sondaı-aq ıtalıandyq BAQ ókilderi qatysty, dep habarlaıdy QR SІM baspasóz qyzmeti.
Konferentsııa jumysyna qazaqstandyq taraptan Elshilik ókilderinen basqa QR Parlamenti Májilisiniń depýtaty, QHA depýtattyq tobynyń jetekshisi Jumataı Álıev qatysty. Ol ıtalıandyq jurtshylyqtyń aldynda «Qoǵamdyq kelisim men ulttyq birliktiń qazaqstandyq modeli» taqyrybyna baıandama jasady.
Konferentsııa barysynda qatysýshylardyń nazaryna sondaı-aq ISAG Geosaıasat jáne sabaqtas pánderdiń joǵarǵy mektebi ınstıtýtynyń ǵylymı qyzmetkeri Alessandro Lýndınıdiń «Qazaqstan Konstıtýtsııasy men Qazaqstan halqy Assambleıasyna 20 jyl» atty baıandamasy usynyldy.
Italıandyq taraptan is-sharaǵa sondaı-aq Italııa Respýblıkasy Parlamentiniń depýtattary Edmondo Chırıellı men Adolfo Ýrso, burynǵy Keńes ókimeti elderiniń zańnamasy máseleleri jónindegi sarapshy Katerına Fılıppını (Mılan qalasynyń ýnıversıteti), Italııada keńinen tanymal, Ka Foskarı ýnıversıtetiniń (Venetsııa) tarıh, mádenıet jáne geosaıasat jónindegi professory, Mılan Halyqaralyq saıasat boıynsha zertteýler ınstıtýtyndaǵy Kavkaz jáne Ortalyq Azııa boıynsha baǵdarlamanyń jetekshisi Aldo Ferrarı, ISAG Geosaıasat jáne sabaqtas pánderdiń joǵarǵy mektebiniń sarapshy Danıele Skalea spıker retinde sóz sóıledi.
Italıandyq tarap ókilderi óz sózderinde konstıtýtsııalyq qurylystyń qazaqstandyq tájirıbesine joǵary baǵa berip, Qazaqstan Prezıdenti Nursultan Nazarbaevtyń Qazaqstannyń konstıtýtsııalyq damýyndaǵy erekshe rólin atap ótti. Budan basqa, Qazaqstannyń qoǵamdyq-saıası turaqtylyqty saqtaýdaǵy, ultaralyq jáne konfessııaaralyq kelisimdi qamtamasyz etýdegi jetistikteri, sonymen qatar demokratııalandyrý jáne yryqtandyrý úderisiniń turaqtylyǵy men birizdiligi basa aıtyldy.
Konferentsııaǵa qatysýshylarǵa arnap ultaralyq jáne konfessııaaralyq qarym-qatynastar, rýhanı mádenıet jáne Qazaqstan halqynyń dástúrleri salasyndaǵy tanymal qazaqstandyq avtorlardyń Qazaqstan halqy assambleıasynan alynǵan ǵylymı eńbekteri men zertteýlerinen kitap kórmesi uıymdastyryldy. Іs-sharaǵa qatysýshylarǵa QHA týraly derekti fılm kórsetildi.