Rım Papasynyń sapary toqtatylǵany týraly aqparat shyndyqqa janaspaıdy - resmı ókil
Uıymdastyrýshylar sezd qarsańynda elordada jańa álemdik rekord tirkelgenin málimdedi. Rekordtyń mıssııasy – eń kóp ultty mýzykalyq topty bir sahnaǵa jınaý. Bul mıssııa oryndaldy.
«Álem mýzykasy» dep atalatyn jobaǵa jer betindegi 51 elden 75 ult ókilderi qatysty. Bul rekordty Astanaǵa arnaıy kelgen Gınnes rekordtar kitabynyń resmı tóreshisi Djek Brokbank bekitti», - dep atap ótti sezdiń resmı ókili Nazym Janǵazınova.
Onyń málimetinshe, sezge 49 elden álemdik, dástúrli jáne ulttyq dinder ókilderinen 104 delegatsııa qatysady. Tarıhta alǵash ret Rım Papasy Frantsısk sezd jumysyna qatysady. Onyń saparynyń toqtatylǵany týraly birqatar aqparat kózderinde jarııalanǵan jazba shyndyqqa janaspaıdy.
«Sezd qatysýshylarynyń qatarynda birqatar halyqaralyq uıymdardyń birinshi tulǵalary bar: BUU (A. Gýterrısh), IYU (I. Taha), ICESCO (S. ál-Malık), Órkenıetter Alıansy (M. Moratınos) ókilderi jáne basqalar. 560-tan astam jýrnalıst akkredıtatsııadan ótýge ótinish bildirse, onyń 153-i halyqaralyq aqparat agenttikteriniń tilshileri. CNN, BBC, Al Jazeera, Bloomberg jáne basqa da halyqaralyq jáne ulttyq BAQ sııaqty medıa-ımperııalar aldaǵy sezdiń taqyryptary men máselelerin belsendi túrde jarııalap jatyr», - dedi resmı ókil.
Aıta keteıik, keshe Memleket basshysy Parlament Senatynyń Tóraǵasy Máýlen Áshimbaevty qabyldap, dinder sezine daıyndyq sharalaryn pysyqtaǵan bolatyn.
Foto: infosmi.net