Rım Papasynyń Qazaqstanǵa memlekettik saparynyń jospary jarııalandy

NUR-SULTAN. QazAqparat – QR Syrtqy ister mınıstrligi Rım Papasy Frantsısktiń 13-15 qyrkúıekke josparlanǵan Qazaqstanǵa memlekettik saparynyń baǵdarlamasyn jarııa etti, dep habarlaıdy QazAqparat.

Sapardyń birinshi kúni Rım Papasynyń Qazaqstan Prezıdenti Qasym-Jomart Toqaevpen, sondaı-aq elimizde tirkelgen sheteldik dıplomatııalyq korpýs jáne azamattyq qoǵam ókilderimen kezdesýleri josparlanǵan.

Rım-katolık shirkeýiniń basshysy saparynyń ekinshi kúninde Álemdik jáne dástúrli dinder lıderleriniń VII seziniń ashylýyna jáne plenarlyq otyrysyna, sondaı-aq keıbir basqa din lıderlerimen birqatar kezdesýlerge qatysady dep kútiláp otyr.

Sonymen qatar, 14 qyrkúıekte Rım Papasy Frantsısk myńdaǵan katolık dinin ustanýshylar, onyń ishinde Qazaqstan astanasyna arnaıy keletinderi úshin duǵa (messa) ótkizedi.

Sapardyń sońǵy kúninde ol Álemdik jáne dástúrli dinder lıderleriniń VII seziniń jabylýyna jáne onyń qorytyndy deklaratsııasynyń qabyldanýyna qatysýdy, sondaı-aq Rım-katolık shirkeýiniń Qazaqstandaǵy jáne kórshi elderden keletin din qyzmetkerlerimen, monahtarymen jáne semınarısterimen kezdesýdi josparlap otyr.

Buǵan deıin habarlanǵanyndaı, Prezıdent Qasym-Jomart Toqaevtyń shaqyrýymen 13-15 qyrkúıekte Rım Papasy Frantsısk Qazaqstanǵa memlekettik saparmen keledi.

Rım Papasy Frantsısk – Qazaqstan astanasynda dástúrli túrde úsh jyl saıyn ótetin Álemdik jáne dástúrli dinder lıderleriniń sezine qatysýyn rastaǵan Rım-katolık shirkeýiniń birinshi basshysy.

Esterińizge salsaq, Rım-katolık shirkeýi basshysynyń, atap aıtqanda Papa Ioann Pavel ekinshiniń Qazaqstanǵa tuńǵysh sapary 2001 jylǵy 22-25 qyrkúıek aralyǵynda ótken.

Foto : gov.kz