Rım Papasy pandemııadan keıingi kezeńdegi basymdyqtardy atady

NUR-SULTAN. QazAqparat – Qazaqstan mańyzdy qundylyqtardy saqtaý baǵytynda qadamdar jasap keledi. Búgin elordadaǵy Álemdik jáne dástúrli dinder lıderleriniń VII sezinde Rım Papasy Frantsısk osylaı aıtty, dep habarlaıdy QazAqparat tilshisi.

«Qazaq jerinde 20 jyldan beri álem úshin mańyzy zor osy sezd uıymdastyrylyp keledi. Bıylǵy kezdesý bizdi pandemııadan keıingi kezeńde adamzattyń rýhanı, áleýmettik damýyndaǵy róli týraly oılanýǵa baǵyttap otyr. Pandemııa nazar aýdarǵym keletin tórt jahandyq problemanyń ishindegi negizgisi bolyp tur. Bul bizden jáne dinnen ortaq ıgi nıettiń bolýyn talap etedi. Koronavırýs barshamyzdy bir deńgeıge túsirip, barlyǵymyz qarapaıym adam ekenimizdi eske túsirdi. Uly aqyn Abaıdyń shyǵarmalarynan osy jaıynda tereń túsinýge bolady», - dedi Rım Papasy.

Osy oraıda ol álem elderinde pandemııa jaılaǵan kezde barsha adamzat óziniń álsiz ári kómekke muqtaj ekenin sezingenin aıtty. Sondyqtan qazirgi kezde yntymaqtastyq baılanystardy keıinge ysyryp qoıa almaımyz. Barshamyzǵa ortaq kúrdeli problemalardy birlese sheshýimiz kerek.

«Osy oraıda din beıtarap qalmaýy tıis. Bul turǵyda din alǵa jetelep, synaq aldynda adamdardyń birligine qoldaý tanytýy kerek», - dedi Pontıfık.

Rım Papasy álsizderdi tyńdap, halyqtyń osal toptaryna sóz berip, ortaq yntymaqtastyqqa qoldaý jasaýǵa shaqyrdy. Bul másele birinshi kezekte pandemııa kezinde zardap shekken kedeı ári muqtaj adamdar qatysty bolyp tur.