Rım Papasy qyrkúıekte Qazaqstanda orys pravoslav shirkeýiniń basshysymen kezdeskisi keletinin bildirdi

NUR-SULTAN. QazAqparat – Rım Papasy Frantsısk qyrkúıekte Qazaqstanda Máskeý jáne búkil Reseı Patrıarhy Kırıllmen kezdeskisi keletinin bildirdi. Bul týraly ol seısenbide Isa qoǵamynyń eýropalyq jýrnaldarynyń basshylaryna bergen suhbatynda aıtty. Suhbat úzindileri La Stampa gazetinde jarııalandy, al kezdesýdi La Civilta Cattolica jýrnaly uıymdastyrǵan. Bul týraly QazAqparat TASS aqparat agenttigine silteme jasap habarlaıdy.

«Men onymen 14 maýsymda Ierýsalımde kezdesip, ortaq isterimiz týraly sóılesýim kerek edi», - dep eske saldy pontıfık. Frantsısk Ýkraınadaǵy qaqtyǵysqa baılanysty dıalog durys túsinilmeı qalmaýy úshin kezdesýdi keıinge qaldyrý týraly sheshim qabyldanǵanyn aıtty.«Men onymen qyrkúıekte Qazaqstanda kezdesetinime úmittenemin. Sálemdesip, pastor retinde azǵantaı áńgimelesemiz degen senimdemin», - dedi Frantsısk.

Sáýir aıynda Rım-katolık shirkeýiniń basshysy 14-15 qyrkúıekte Nur-Sultanda ótetin Álemdik jáne dástúrli dinder kóshbasshylarynyń VII sezine qatysatynyn rastady. Qazaqstan 2003 jyly Álemdik jáne dástúrli dinder kóshbasshylarynyń sezin shaqyrý týraly bastama kóterdi, sodan beri forým turaqty is-sharaǵa aınalǵan.

Vatıkanda Rım Papasynyń Qazaqstanǵa sapary týraly áli resmı túrde jarııalanǵan joq. Shilde aıynyń basyna josparlanǵan Kongo Demokratııalyq Respýblıkasy (KDR) men Ońtústik Sýdanǵa kelesi saparyn pontıfık tizesi aýyrsynýyna baılanysty keıinge qaldyrdy.