Rım Papasy klımat máselelerin kóterdi – sezd

NUR-SULTAN. QazAqparat – Búgin elordadaǵy Álemdik jáne dástúrli dinder lıderleriniń VII sezinde Rım Papasy Frantsısk álemdegi klımat problemalaryn kóterdi, dep habarlaıdy QazAqparat tilshisi.

«Bizdiń aldymyzda turǵan taǵy bir problema bizdiń ortaq úıimizdi qorǵaýǵa qatysty bolyp tur. Klımattyń eleýli túrde ózgergenin eskersek, biz ásem tabıǵatty keler urpaqqa saqtaýymyz kerek. Abaı óleńinde: «Bezendirip jer júzin Táńirim sheber, meıirbandyq dúnıege nuryn tóger», dep jazǵan. Jaratýshy tabıǵatty jaınatyp jasartqan. Sondyqtan jer betin lastaýǵa, orasan zor zalal keltirýge qalaısha jol beremiz? Barshańyzdy osy máseleni birlesip sheshýshe shaqyramyn», - dedi Rım Papasy.

Pontıfıktiń paıymynsha, klımattyń ózgerýi turǵysyndaǵy problema pandemııaǵa tikeleı qatysty bolyp tur.

«Ormandy jerlerdi aıaýsyz joıý, janýarlardy zańsyz satý sııaqty mysaldar jeterlik jáne osy jaıynda oılanýymyz kerek. Osy ómirde qanaýshylyq minez-qulyq bizdiń ortaq úıimizge orasan zor nuqsan keltirip jatyr», - dedi Rım Papasy.