Rım Papasy Irakqa keldi
5 naýryz kúni Rım-katolık shirkeýi basshysynyń ushaǵy Baǵdad áýejaıyna qondy. Ony Iraktyń premer-mınıstri Mýstafa Kazym men ulttyq kıim kıgen jergilikti halyq qarsy aldy. Málim etilgendeı, sozylyp otyrǵan pandemııaǵa jáne qaýipsizdik máselelerine baılanysty bul – 84 jastaǵy Papa úshin táýekeli eń joǵary sapar bolyp otyr. Osyǵan qaramastan, pontıfık sapar shegýge tabandylyq bildirip, «mindettemelermen baılanǵanyn» atap ótken. Sondaı-aq ol 1999 jyly Iraktyń sol kezdegi prezıdenti Saddam Hýseınniń úkimetimen kelissózder júzege aspaı qalýynan Papa ІІ Ioann Paveldiń sapary toqtatylǵanyn meńzeı otyryp, ırak hrıstıandaryn ekinshi ret qapy qaldyra almaıtynyn aıtqan.
Baǵdad pen áýejaı arasyndaǵy jol boıynda júzdegen adam jınaldy. Pontıfık áýejaıdan dástúrli túrde «papamobılmen» emes, oq ótpeıtin avtokólikpen shyqqan. Oǵan ondaǵan kólik korteji ilesip júrdi. Irak astanasynyń áýejaıyna taıaýda shabýyl jasalǵandyqtan, el úkimeti joǵary qaýipsizdik sharalaryn qolǵa alǵan.
Prezıdent saraıynda Papa Frantsıskti Irak prezıdenti Barham Salıh qarsy aldy. Katolık shirkeýiniń basshysy óziniń alǵysózinde Irakqa kelgenine qýanyshty ekenin jáne eldi órkenıet besigi dep atady. Sondaı-aq zorlyq-zombylyq pen ekstremızm aktilerine toqtaý bolatynyna úmit bildirdi.
Óziniń sapary aldynda Papa Frantsısk Irak halqyna vıdeoúndeý joldaǵan bolatyn. Onda bul elge «kóptegen jyldar boıǵy soǵys pen terrorızmnen keıin, Qudaıdan keshirim men tatýlyq suraý úshin dindár retinde, táýbesine kelgen dindár retinde bara jatqanyn» aıtqan edi.
Túrli statıstıka boıynsha, búginde Irakta 250 myńǵa jýyq hrıstıan turady. Olardyń shamamen úshten ekisi haldeı katolıkteri bolyp tabylady. Shirkeýleri ózderiniń derbes lıtýrgııasy men dástúrin saqtap keledi. Degenmen, Rım Papasynyń bıligin moıyndaýda.
Habarlanǵandaı, Papa Frantsıks pen oǵan ilesip júrgen delegatsııa sapar aldynda koronavırýsqa qarsy Pfizer/BioNTech vaktsınasyn saldyrǵan.
Rım-katolık shirkeýiniń basshysy elge sapary barysynda ırak sheıitteriniń basshysy aıatolla Álı ál-Sıstanımen kezdesýge, kóne Ýr qalasynda ótetin dinaralyq sharaǵa qatysady. Jeksenbi kúni pontıfık Mosýlǵa barady. Onda terrorızm qurbandary úshin duǵa oqıdy. Odan keıin Qarkoshke jol tartyp, Erbıle stadıonynda lıtýrgııa ótkizedi.