Rım Papasy elimizge sapary qarsańynda dombyra jaıynda málimettermen tanysqan - depýtat

NUR-SULTAN. QazAqparat – Búgin elimizge memlekettik saparmen kelgen Rım Papasy Frantsısk ulttyq aspabymyz dombyra týraly kóp málimetpen tanysqan. Bul týraly «Jibek Joly» telearnasyndaǵy «Jańa ýaqyt» baǵdarlamasyna suhbat bergen QR Parlamenti Májilisiniń depýtaty Aıgúl Qapbarova málimdedi, dep habarlaıdy QazAqparat tilshisi.

«Búgin Memleket basshysynyń qatysýymen jıyn ótti. Onda Rım Papasy qazaqstandyqtarǵa sóz arnaýyn aıtty. Ol óz sózinde qazaqtyń dástúri men mádenıetine toqtaldy. Ásirese, bizdiń ulttyq aspabymyz dombyra týraly kóp málimetpen tanysypty. Qazaqstanǵa at basyn burǵasyn, onyń mádenıeti men adamgershilik qaǵıdalaryn ábden zerttegen bolýy kerek. 2000-shy jyldardan beri Qazaqstan rýhanı pikiralmasý alańy bolyp otyr. Bul baǵytta elimiz álemdik jaǵdaıdy jaqsartýda gýmanıstik qadam jasap keledi. Alǵashqy sezge álemniń 13 elinen kelgen delegatsııa qatysqan bolsa, bıyl 50 memleketten 100-den asa delegattar qatysyp otyr», - dedi Aıgúl Qapbarova.

Suhbat barysynda Májilis depýtaty Álemdik jáne dástúrli dinder lıderleriniń VII sezine oraı, qazir álem elderiniń nazary Qazaqstanda ekenin atap ótti.

«Mundaı sezdi ótkizý – Qazaqstannyń syrtqy saıasattaǵy úlken jeńisi. Óıtkeni, qazirgi kezeńde kóptegen elderde shıelenis bolyp jatyr. Sondyqtan Rım papasy Memleket basshysynyń shaqyrtýyn qabyl alyp, sezge arnaıy keldi. Beldi din lıderleri qaqtyǵystar men shıelenisterdi beıbit jolmen sheshý úshin bas qosýda», - dep málim etti depýtat.

Aıgúl Qapbarovanyń málimetinshe, sezd qorytyndysy boıynsha qabyldanatyn deklaratsııa Birikken ulttar assambleıasynda resmı qujat retinde bekitiledi.

Foto: aptamedia.kz