Rım Papasy beıbitshilik pen ózara túsinistikke shaqyratyn bastamalarǵa sebepshi bolýy múmkin – Toqaev
Kezdesý aldynda Pontıfıkti Prezıdent saraıynda resmı qarsy alý rásimi boldy. Qurmet qaraýyly rotasynyń bastyǵy raport bergennen keıin eki eldiń memlekettik ánurandary shyrqaldy. Qasym-Jomart Toqaev pen Rım Papasy Qurmet qaraýylynyń aldynan ótip, ekijaqty kelissóz júrgizý úshin «Shyǵys» zalyna bardy.
Qasym-Jomart Toqaev Katolık shirkeýiniń basshysyna iltıpat bildire otyryp, Qazaqstanǵa kelgeni úshin rızashylyǵyn bildirdi.
– Sizdiń Qazaqstanǵa, jalpy aıtqanda, Ortalyq Azııa aımaǵyna alǵashqy apostoldyq saparyńyz meniń otandastarymdy qaı dindi ustanatynyna qaramastan zor qýanyshqa bóledi. Sizdiń bul saparyńyzdy qaıyrymdylyq pen ádildik jolyndaǵy rýhanı kóshbasshylyqtyń jarqyn úlgisi retinde baǵalaımyn. Qasıetti Ioann Paveldiń Qazaqstanǵa jasaǵan tarıhı sapary 2001 jyly qyrkúıekte, sol jylǵy 11 qyrkúıekte búkil álemdi aýyr kúızeliske túsirgen AQSh-taǵy terrorlyq aktiden keıin boldy. Onyń sımvoldyq máni zor edi, – dedi Memleket basshysy.
Prezıdent Rım Papasynyń sapary halyqaralyq arenadaǵy jaǵdaıdyń shıelenisýi men álemdegi aýyr geosaıası ahýal aıasynda ótip jatqanyna nazar aýdardy.
Qasym-Jomart Toqaev Katolık shirkeýi basshysynyń Qazaqstanǵa kelýi jáne onyń Álemdik jáne dástúrli dinder kóshbasshylarynyń sezine qatysýy óte mańyzdy oqıǵa ekenin atap ótti. Prezıdenttiń aıtýynsha, Rım Papasy beıbitshilik pen ózara túsinistikke shaqyratyn bastamalarǵa sebepshi bolýy múmkin.
Ózara senim men qurmet kórsetý jaǵdaıynda ótken kezdesýde Memleketimizdiń basshysy men Rım Papasy konfessııaaralyq kelisim men dinaralyq dıalogty, Qazaqstan men Vatıkan arasyndaǵy yntymaqtastyqtyń damý perspektıvalaryn ilgeriletýdiń ózekti máselelerin talqylady, sondaı-aq qazirgi zamannyń syn-qaterleri jóninde pikir almasty.
Foto: akorda.kz