Rım papasy AQSh saılaýyndaǵy eki kandıdatty da jaratpaı tastady

<p>ASTANA. KAZINFORM — AQSh prezıdenttigine úmitkerlerdiń ekeýi de — Donald Tramp pen Kamala Harrıs «ómirge qarsy shyǵýshylar». Bul týraly Rım papasy Frantsısk Ońtústik-Shyǵys Azııa men Okeanııa elderine apostoldyq saparyn aıaqtap, Sıngapýrdan kele jatqan ushaq bortynda ótken baspasóz máslıhatynda málimdedi, dep habarlaıdy <a href="https://tass.ru/mezhdunarodnaya-panorama/21861241" target="_blank" rel="noopener">TASS</a> aqparat agenttigi. </p>

— Ekeýi de ómirge qarsy: biri mıgranttardy qýyp jiberse, ekinshisi balalardy óltirýde, — dedi pontıfık AQSh-taǵy saılaý týraly suraqqa jaýap berip. 

ANSA agenttiginiń habarlaýynsha, jýrnalıster 87 jastaǵy pontıfıkten «biri túsik jasatýdy jaqtaıtyn, ekinshisi mıgranttardy deportatsııalaıtyn kandıdattardy tańdaý kezinde katolık saılaýshylarǵa qandaı keńes beresiz?» dep suraǵan. 

— Mıgranttardy elden qýyp jiberý, olardyń durys ómir súrýine múmkindik bermeý, damytpaý — jaman nárse, zulymdyq. Balany anasynyń qursaǵynan shyǵarý — kisi óltirý. Munda anyqtyq qajet. Qazirgi saıasatta daýys bermeı qalys qalý durys emes deıdi, al eger daýys berseń, «zulymdyǵy barynsha azyn» tańdaý kerek: qaısy bolsa da (Donald Tramp nemese Kamala Harrıs) — árkim óz ar-ojdanyna qaraı tańdaǵany jón, — dep keńes berdi Rım katolık shirkeýiniń basshysy.

Frantsısk buǵan deıin Trampty mıgranttarǵa qatysty saıasaty úshin janama aıyptap, «qabyrǵa turǵyzǵandy jaqsy hrıstıan dep sanaýǵa bolmaıtynyn» aıtqan. 

Papanyń AQSh-tyń burynǵy prezıdentimen ózge de kelispeýshilikteri bolǵany belgili. Mysaly, Tramptyń klımat boıynsha Parıj kelisiminen shyǵý sheshimi aıasynda klımattyń ózgerýi máselesi. 

Qazirgi prezıdent Djo Baıden — katolık dinin ustanýshy, biraq túsik jasatý quqyǵyn qoldaıdy. Tramp jáne ony qoldaýshy konservatıvti katolıkter túsik jasatýǵa qarsy.

Vıtse-prezıdent Kamala Harrıs pen burynǵy prezıdent Donald Tramp Fıladelfııadaǵy (Pensılvanııa) ulttyq konstıtýtsııa ortalyǵyndaǵy teledebatta alǵash ret kezdesti.