Rıkardo Kaka: Jerebe tartý rásimin taza júrekpen qabyldaý kerek

ASTANA. QazAqparat – Fýtzaldan Qazaqstan ulttyq quramasynyń bas bapkeri Rıkardo Kaka 2024 jylǵy álem chempıonatyna irikteý kezeńi elıtalyq raýndynyń jerebe tartý qorytyndysyna qatysty pikir bildirdi, dep habarlaıdy QazAqparat Qazaqstan fýtbol federatsııasyna silteme jasap.

Jerebe tartý rásimin taza júrekpen qabyldaý kerek. Áldebir komandanyń bizdiń topqa túskenin qalaýdyń qajeti joq dep únemi oıynshylarǵa aıtamyn. Jerebe qalaı tartylady, qarsylastar sol arqyly anyqtalady

, - dedi bas bapker.

Álem chempıonatynyń fınaldyq kezeńine shyǵý úshin Qazaqstan quramasy Nıderland, Rýmynııa jáne Ázerbaıjan quramalarymen kúsh synasady. Kaka jerebe nátıjesi boıynsha burynnan tanys qarsylastar kezdesip otyrǵanyn aıtady.

Ázerbaıjan quramasymen jıi oınaımyz. Biz úshin de, olar úshin de qashyqtyq qysqaraq bolmaq. Іrikteý oıyndarynda qarsylasqa jetý úshin jol sapary únemi uzaq bolatyn. Endi eki komanda úshin qolaıly bolǵaly tur. Ázerbaıjan quramasy – brazılııalyq oıynshylarmen jaqsy jasaqtalǵan jáne bilikti bapkeri bar tanys komanda. Rýmynııa quramasy da bizge boıdy erkin ustaýǵa múmkindik bermeıdi. Sońǵy Álem chempıonatynyń irikteý kezeńindegi tájirıbesin jaqsy bilemiz. Negizgi irikteý kezeńinde Rýmynııany óz alańynda utyp, Chehııada ótken elıtalyq oıynda jeńilgen edik. Biz barlyq qarsylastardy qatty qurmetteımiz. Nıderland – ár ýaqytta ósip, ózgeretin komanda. Ujymdy Ispanııadan kelgen óte saýatty bapker Mıgel Andreas qabyldady. Ol «Ýdıneze» jáne «Barselonada» jumys istegen. Top óte birkelki jáne jaqsy dep aıta alamyn. Biz daıyndalamyz, aldymyzda álem chempıonatynyń fınaldyq kezeńine shyǵý mindeti tur

, - dedi ol.