Rıdderdiń jylý berý júıesi qashan qalpyna keledi: Aqsholaqov jaýaby

ASTANA. QazAqparat - QR Energetıka mınıstri Bolat Aqsholaqov Rıdder jylý elektr ortalyǵyndaǵy apatqa qatysty túsinik berdi, dep habarlaıdy QazAqparat tilshisi.

«Keshe jóndeý jumystarynyń birneshe túrin iske qostyq. Qazandyqty toqtattyq. Qazir ol salqyndaýǵa qoıyldy. Sodan keıin qazandyqta tesiktiń bar-joǵy tekseriledi. Qazirgi ýaqytta 3 qazandyq jylý berip tur. Biraq, bul talap etetin temperatýradan tómen», - dedi mınıstr Senattyń jalpy otyrysynan keıin BAQ ókilderiniń saýalyna oraı.

Onyń atap ótýinshe, búgin №6 qazandyqtan taǵy aqaý shyqqan.

«Ony tez arada joıý úshin ýaqyt qajet. Munyń bári jabdyqtardyń tozýymen baılanysty. Negizgi suraq basshylyqqa emes, stansanyń menshik ıesine qoıylǵany jón sııaqty. Biz qazir sonymen aınalysyp jatyrmyz. Bul zańǵa qatysty másele. Qazir eń bastysy – temperatýrany kóterý», - dedi Bolat Aqsholaqov.

Búgin túngi saǵat 01:00-de Shyǵys Qazaqstan oblysynyń Rıdder qalasyndaǵy jylý elektr ortalyǵynda taǵy aqaý shyqqanyn habarlaǵan edik.