Rıdderdegi jylý ortalyǵyn jóndeý memleket qarjysy esebinen iske asyrylady

ASTANA. QazAqparat – Rıdder jylý elektr ortalyǵyn jóndeý jumystary memleket qarjysy esebinen iske asyrylady. Bul týraly Energetıka vıtse-mınıstri Jandos Nurmaǵanbetov aıtty, dep habarlaıdy QazAqparat tilshisi.

«Rıdder máselesine toqtalsaq, jaqynda oblys ákimimen, atalǵan nysannyń ıesimen sóılestik. Rıdder jylý elektr ortalyǵynyń ıesi nysandaǵy jóndeýdi tıisti deńgeıde qarjylandyra almaıtynyn túsinip otyr. Bul turǵyda ákimdik bul stantsııany tolyq basqarýdy óz qolyna aldy. Stantsııa men «Óskemen jylý jelileri» kommýnaldyq kásiporny arasynda senimgerlik basqarý sharty jasaldy», - dedi J. Nurmaǵanbetov Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, Rıdder qalasyndaǵy qazandyqtar men JEO-nyń qosalqy jabdyqtaryn jóndeýge jumsalatyn qarajat boıynsha jáne basqa da shyǵyndarǵa qatysty mamandar eseptep shyǵarǵan esep-qısap aıasynda tıisti ótinim rásimdeldi.

«Qarajat bólý týraly oblys ákimdiginen Úkimetke, Qarjy mınıstrligine tıisti ótinish kelip túsedi dep kútip otyrmyz. Taıaýda Úkimet tıisti sheshim qabyldap, Rıdderde jóndeý jumystary bastalady dep oılaımyn», - dedi vıtse-mınıstr.

Onyń aıtýynsha, jylý elektr ortalyǵy ıesinde nysandy jóndeýge qarajat salýǵa múmkindigi joq.

«Bul jaǵdaıda Úkimet Rıdderge qatysty qarjylandyrýdy ózine alyp otyr. Osy rette atalǵan nysandaǵy jóndeý jumystary bıýdjet esebinen júrgiziledi», - dedi Jandos Nurmaǵanbetov.

Budan buryn habarlanǵandaı, ShQO ákimdiginiń málimetine súıensek, Rıdder jylý elektr ortalyǵyn jóndeý jumystary jaqyn arada bastalady.