Rıdderdegi jalǵyz qazaq mektebi jabyldy ma – ákim jaýaby

<p>Shyǵys Qazaqstan oblysynda apatty jáne úsh aýysymdy mektep joq. Bul týraly oblys ákimi Ermek Kósherbaev aıtyp berdi, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

«Oblysta 343 mektep bar, onda 98 myń bala oqıdy. Apatty jáne úsh aýysymdy mektepter joq. Jyl saıyn mektepterdiń tehnıkalyq jaǵdaıyn jaqsartýǵa qajetti qarajat bólinedi. 2025 jylǵa qaraı 5600 oqýshyǵa arnalǵan 15 mektep salynady, onyń ishinde «Jaıly mektep» aıasynda 10 mektep josparlanyp otyr, onyń ishinde Óskemen qalasynda 5 mektep, Rıdder qalasynda – 1, Shemonaıha qalasynda – 1, Glýbokoe aýdanynda – 3 mektep salynady», - dedi E. Kósherbaev Ortalyq kommýnıkatsııalar qyzmetinde ótken baspasóz máslıhatynda.

Sonymen birge, ákim Rıdder qalasyndaǵy jalǵyz qazaqtildi «Shańyraq» mektebiniń jabylýy týraly qaýesetterge jaýap berdi.

«Jazdyń kúni «Shańyraq» atty jalǵyz qazaqtildi mektep jabyldy degen daý bolǵan edi. Bul durys emes, anyǵynda bul mektep jabylǵan joq. Kezinde jańa ǵımaratqa kóshirý týraly ýáde berilgen jáne bul ǵımaratqa qazaqsha jáne oryssha eki mektep qatar kóshirilgen. Onda 600 balanyń 300-i qazaqsha, 300-i oryssha bilim alýda. Kelesi jyly Rıdder qalasynda 1200 orynǵa 2 mektep salý josparlanýda. Sol mektepter qurylysy aıaqtalǵanda mektepter ekige bólinedi», - dep túsindirdi oblys ákimi.

Mektepterdiń birin bıznestiń áleýmettik jaýapkershiligi sheńberinde «Qazmyrysh» salady. Taǵy bir bilim oshaǵy «Jaıly mektep» ulttyq jobasy boıynsha josparlanǵan.

Sondaı-aq, bıyl oblysta balabaqshalarda jańa 2700 oryn ashylady 2 jastan 6 jasqa deıingi balalardyń 98,4%-y orynmen qamtylǵan.

«Az qamtylǵan otbasylardan shyqqan 5 myń otbasy balalary balabaqshaǵa tegin barady. 22 myń oqýshy mektep formasymen, aıaq kıimmen, jazǵy lagerge joldamamen qamtamasyz etilgen. Prezıdent tapsyrmasymen 1-4 synyp oqýshylarynyń barlyǵy tegin tamaqpen qamtylǵan», - dedi E. Kósherbaev.