Rıdderde tótenshe jaǵdaı rejımi alynyp tastaldy
ShQO ákimdiginiń málimetinshe, «Rıdder JEO» AQ ıesi aýysqaly beri aqaýlar tyıylyp, jylý máselesi sheshimin taýyp keledi.
Qazirgi ýaqytta ortalyq shtattyq rejımde jumys istep tur.
JEO ıeleri kelesi jylytý maýsymyna deıin júrgiziletin jóndeý jumystarynyń kestesin jasaýda.
«Osyndaı qıyn kezde dúrbeleńge boı aldyrmaı, qaýesetterge senbeı, bolyp jatqan jaǵdaılarǵa túsinistikpen qaraǵan Rıdder qalasynyń turǵyndaryna alǵysymdy bildiremin. Rıdder ákimine jylý elektr ortalyǵynyń qazir aqaýsyz jumys isteýine baılanysty qaladaǵy jergilikti aýqymdaǵy tehnogendik sıpattaǵy tótenshe jaǵdaı rejımin alyp tastaýdy tapsyrdym», - deıdi oblys ákimi Danıal Ahmetov.
Osylaısha, Rıdderde engizilgen tótenshe jaǵdaı barlyǵy úsh aıǵa sozylyp otyr.
Eske salsaq, qańtar aıynda Rıdderdegi jylý elektr ortalyǵynyń ıesi aýysqanyn habarlaǵan edik.
Foto: tets.kz