Rıdderde polıtseıler órtengen úıden er adamdy qutqaryp qaldy

ÓSKEMEN. QazAqparat – Shyǵys Qazaqstan oblysy Rıdder qalasynda polıtsııa qyzmetkerleri órtengen úıden er adamdy qutqaryp qaldy, dep habarlaıdy QazAqparat tilshisi

ShQO Polıtsııa departamenti baspasóz qyzmetiniń málimetine súıensek, 8 qarashada keshki ýaqytta tártip saqshylary Eljan Omarov pen Ahmetýálı Aqanov patrýldeý kezinde otqa oranǵan úıdi baıqaǵan. Birden «112» jedel arnasyna habar bergen olar órt sóndirýshilerdi kútpesten úıdiń aýlasyna bettedi.

«Syrtta turǵan jasóspirim qyz úı ishinde adam bar ekendigin aıtty. Bólmelerdiń biriniń terezesin ashqan polıtseıler er adamdy kórip, ony alyp shyqty. Sońynan anyqtalǵandaı, monshadan shyqqan qyzyl jalyn tez arada garaj ben úıge tarap ketti», - delingen aqparatta.

Úı ıesin qaýipsiz jerge kóshirgen Eljan Omarov pen Ahmetýáli Aqanov oǵan avtokólikti garajdan shyǵarýǵa kómektesti. Kóp uzamaı oqıǵa ornyna qutqarýshylar men jedel járdem kelip jetti. Er adamnyń densaýlyǵyna eshqandaı zaqym kelmegen.