Rıdderde para alǵan polıtseı sheninen aıyrylyp, 7,5 mln teńge aıyppul tóleýge mindetteldi

ÓSKEMEN. QazAqparat – Shyǵys Qazaqstan oblysy Rıdder qalasynda para alǵan polıtseı sheninen aıyrylyp, 7,5 mln teńge aıyppul tóleýge mindetteldi, dep habarlaıdy QazAqparat tilshisi.

Rıdder qalalyq sotynda para alǵan polıtseıge qatysty sot isi qaraldy.

«Aıyptalýshy qalalyq polıtsııa bóliminiń tergeý bólimshesi bastyǵynyń orynbasary bolyp qyzmet etken. Óz laýazymyn asyra paıdalanǵan ol tirkelgen qylmystyq isterdi toqtatamyn dep áıel adamnan 250 000 teńge kóleminde para alǵan», - dep habarlady sottyń baspasóz qyzmetinen.

Sot sheshimimen sottalýshy QR Qylmystyq Kodeksiniń 366-baby 2-bóligimen (quqyq qorǵaý organy qyzmetkeriniń aqsha túrindegi para alýy) kináli dep tanyldy.

30 jastaǵy er adam polıtsııa kapıtany sheninen aıyrylyp, 7 500 000 teńge mólsherinde aıyppul tóleýge mindetteldi. Sondaı-aq oǵan ómir boıyna memlekettik qyzmette jumys isteýge tyıym salyndy.