Rıdderde bolashaq kóshbasshylar bas qosty

ÓSKEMEN. QazAqparat - Rıdder qalasynda «Rýhanı jańǵyrý» baǵdarlamasynyń aıasynda «Kóshbasshy bolǵyń kelse, menen sura» atty shara ótti, dep habarlaıdy QazAqparat tilshisi.

«Rýhanı jańǵyrý» jalpyulttyq ıdeıasynyń bir tarmaǵy «Tárbıe jáne bilim» kishi baǵdarlamasyn qamtıdy. Sol kishi baǵdarlama aıasynda Rıdder qalasynda «Otanym - taǵdyrym» - «Daryndy urpaq - el bolashaǵy» atty joba jelkenin kerdi.

Jergilikti №1 mektepte ótken sharaǵa ákimdik ókilderi, qoǵamdyq uıym músheleri, «Máńgilik El» tárbıe jáne bilim berý ortalyǵynyń qyzmetkerleri qatysyp, jastarǵa kóshbasshylyqtyń qyr-syryn uqtyrdy.

30-ǵa jýyq jigerli jastyń basyn qosqan sharada úsh túrli sheberlik saǵaty uıymdastyryldy. «Sheshendik negizderi», «Toptyq jumys», «Kreatıvti oılaý» taqyrybynda ótken semınarda kóshbasshylyqqa yntaly jastar óz boılarynda buǵyp jatqan ıgi qasıetterdi oıatyp, damytýdyń tásilderin meńgerdi. «Satylym ýaqyty» degen atpen ótken iskerlik oıyny saýdany saýatty júrgizýge baýlysa, «Óz oıym bar» pikirtalas klýby tyń oılardyń túr-túrin týǵyzdy.

«Qala jastary úshin bul sharanyń mańyzy zor. Tutas ulttyń básekege qabiletti bolýy árqaısymyzdyń adamı qasıetterimizge tikeleı baılanysty. Sondyqtan, órkenıetti qoǵam qurýǵa qaýqarly ult qalyptastyrý úshin jas býyndy qyrandaı baptap, balapandaı baýlýymyz qajet. Búgingi jastyń boıynda kásibı kóshbasshylyq pen jeke adamı qasıetter úılesim taba bilýi shart. Ótkizgen sharamyz sol úılesimge jol ashatyn jattyǵýlar men oıyndarǵa toly boldy» - deıdi aýdandyq ishki saıasat bóliminiń basshysy Anar Dúkenbaeva.

Shara sońynda belsendilik tanytqan qatysýshylar maqtaý qaǵazdarymen, syılyqtarmen marapattaldy.