Rıdderde áıel esirtki taratý úshin balany qasyna ertip júrgen
Belgili bolǵandaı, 34 jastaǵy áıel Rıdder qalasyna ótken jyldyń jeltoqsan aıynda kámeletke tolmaǵan balamen birge basqa oblystan kelgen. Ol ózgelerge balamen kóshede júrgen áıel bolyp kórinip, esirtki taratýmen aınalysty.
- Kúdikti esirtkini aldyn ala oılastyrylǵan shema boıynsha tasymaldaǵan. Jetekshileri oǵan esirtkini qaıdan alyp, qaıda qoıyp ketip otyrý qajettigin aıtqan. Bul kóbinese qoǵamdyq jerler nemese qalanyń adamdar az júretin, ıesiz qalǵan aýdandary boldy, - dep habarlady ShQO Polıtsııa departamentiniń baspasóz qyzmetinen.
Jedel-izdestirý sharalary barysynda áıel adam ustaldy. Jeke tintý júrgizý kezinde polıtseıler untaq tárizdi zat salynyp, ızolentamen oralǵan 80 oramany tárkilegen.
- Saraptama nátıjesi boıynsha tárkilengen zat asa iri kólemdegi sıntetıkalyq esirtki ekeni anyqtaldy. Qazirgi ýaqytta atalǵan fakti boıynsha sotqa deıingi tergeý júrgizilýde. Kúdikti ýaqytsha ustaý ızolıatoryna qamaldy. Al bala kámeletke tolmaǵandardy beıimdeý ortalyǵyna jiberildi, - delingen aqparatta.
Eske salsaq, osyǵan deıin Óskemende kóligin 5 mınýttan artyq qyzdyrǵan 3 adamǵa aıyppul salynǵany habarlanǵan.