Rıdder jylý ortalyǵyndaǵy eki qazandyq bir aptadan keıin iske qosylady

ÓSKEMEN. QazAqparat – Shyǵys Qazaqstan oblysy Rıdder qalasyndaǵy jylý elektr ortalyǵynyń eki qazandyǵy bir aptadan keıin iske qosylady, dep habarlaıdy QazAqparat tilshisi.

Qala ákimdiginiń málimetine súıensek, 12 qyrkúıekte «Rıdder JEO» AQ-da №1, 2 ortasha qysymdy qazandyqtar iske qosylady.

«№1, 2 qazandyqtardy sýmen toltyryp, jylý jelisiniń tyǵyzdyǵy men beriktigin tekseremiz. Sol kezde keıbir jerlerden tamshylap sý ketýi múmkin. Aqaýdy jóndep, odan keıin qaıtadan qysymmen sý berý kerek. Bul jumystar jylytý maýsymy kezinde kidiris bolmaýy úshin jasalyp jatyr», - deıdi Rıdder qalasynyń ákimi Dáýlet Batyrbaev.

Onyń aıtýynsha, ortalyqta kadr tapshylyǵy máselesi bar.

«Óıtkeni sońǵy on jyldyqta kásiporynnan tájirıbeli mamandar ketip qaldy. Jylý ortalyǵyndaǵy bolǵan jaǵdaıdyń bir sebebi sol dep oılaımyn. Prezıdent óziniń Qazaqstan halqyna Joldaýynda jylý jáne elektr energetıkasynyń barlyq salasyn jandandyrý qajet ekenin atap ótken edi. Rıdderdegi JEO-da bul jumystar qazirdiń ózinde júrgizilýde, sonyń ishinde barlyq alty qazandyqty qaıta qurý jáne jóndeý jumystary qarqyndy júrýde», - deıdi Dáýlet Batyrbaev.

Rıdder qalasynyń ákimi bilikti kadr tapshylyǵy máselesin jalaqyny kóterý, áleýmettik paketti jaqsartý, orta jáne joǵary oqý oryndarynda bilim alyp jatqan jas mamandardy jumyspen qamtý arqyly sheshý qajettigin jetkizdi.