Rıdder jylý elektr ortalyǵynda jóndeý jumystary qalaı júrip jatyr

ÓSKEMEN. QazAqparat – Shyǵys Qazaqstan oblysynyń ákimi Ermek Kósherbaev Rıdder jylý elektr ortalyǵynda jóndeý jumystary qalaı júrip jatqanyn tekserdi, dep habarlaıdy QazAqparat.

«Rıdder jylý elektr ortalyǵyna baryp, jumys barysymen tanystym. Qazir munda úsh aýysymda 450 adam jumys isteýde. Elektr qozǵaltqyshtaryn, bekitý armatýralaryn, mazýt, Bager jáne sorǵy stantsııalaryn aýystyrý jumystary qarqyndy júrip jatyr. Barlyq jumystyń jartysy aıaqtaldy, alty qazandyq pen qosalqy jabdyq jóndeý ústinde»,-dep jazdy oblys ákimi óziniń Facebook paraqshasynda.

Onyń sózinshe, tehnologııaǵa sáıkes, ortasha qysymdy úsh qazandyq shamamen 20 qyrkúıekte, sodan keıin keste boıynsha qarashanyń ortasynda joǵary qysymdy qazandyqtar iske qosylady.

JEO jóndeý boıynsha barlyq máseleler dereý jergilikti jerde sheshilýde.

«Meniń orynbasarym Baqytjan Baıahmetov turaqty túrde jumys barysyn qadaǵalaýda. Sonymen qatar, jylytý maýsymynyń basynda kúl úıindisi daıyndalyp, kómir berý traktisi jóndeldi. Barlyq jumystar kestege sáıkes júrgizilip, meniń turaqty baqylaýymda»,-dedi Ermek Kósherbaev.

Osyǵan deıin Rıdder jylý ortalyǵyndaǵy 4 qazandyq 20 qyrkúıekke deıin iske qosylatynyn jazdyq.

Sondaı-aq ortalyqtaǵy kúrdeli jóndeý jumystary jartylaı aıaqtalǵanyn habarladyq.