Rıdder jylý ortalyǵynda 5 qazandyqtaǵy jóndeý jumystary aıaqtaldy

<p>ÓSKEMEN. KAZINFORM &ndash; Shyǵys Qazaqstan oblysy Rıdder qalasyndaǵy jylý elektr ortalyǵynda 5 qazandyqtaǵy jóndeý jumystary óz máresine jetti.</p>

1956 jyly salynǵan Rıdder jylý elektr ortalyǵynda osydan 2 jyl buryn bolǵan apattardan keıin halyq qaıta-qaıta jylýsyz qalyp otyrǵan. 50 myńǵa jýyq turǵyndy jylýmen qamtamasyz etetin JEO Qazaqstan boıynsha «qyzyl aımaqta» qalǵan 19 jylý kózderiniń tizimine engen bolatyn. 

Osyndaı jylý ortalyqtaryn shuǵyl jańǵyrtýdy bıylǵy jyldyń aqpan aıynda ótken keńeıtilgen otyrysta Memleket basshysy Qasym-Jomart Toqaev Úkimetke mindettegen edi. Sóıtip jabdyqtary tozyp turǵan Rıdder JEO-ny jóndeýge respýblıkalyq bıýdjetten 8 mlrd teńge bólingen. 

Foto: ShQO energetıka jáne TÚKSh basqarmasy

Qazirgi ýaqytta 5 qazandyq agregatyn jóndeý jumystary aıaqtaldy. Bul týraly ShQO energetıka jáne TÚKSh basqarmasynan habarlady. 

— 4 qazandyq agregaty iske qosylyp tur. Olar № 1, 2, 3, 6 qazandyqtar. № 4 qazandyq agregatynda iske qosý-jóndeý jumystary júrgizilýde. № 5 qazandyqtaǵy jóndeý aıaqtalý satysynda. Ol sodan keıin rezervke aýystyrylady. Al jylý jelileri tolyqtaı jóndeldi. Bıyl Rıdderde jylytý maýsymy aldyn ala bastaldy. Jylýmen jabdyqtaýda temperatýralyq kesteden aýytqý joq, — delingen aqparatta. 

Eske salsaq, qazan aıynyń basynda Rıdderde jylytý maýsymy bastalsa da JEO-daǵy jóndeý jumystary jalǵasyp jatqany habarlanǵan.