Rıdder jylý elektr ortalyǵynda keshendi jóndeý jumystary bastaldy
Rıdderdegi JEO-da bıylǵy jylytý maýsymy kúrdeli aqaýsyz ótti. Qazirgi ýaqytta ortalyqta kelesi maýsymǵa daıyndyq bastalyp ta ketken. Qazandyqta jylý shyǵyndaryna arnalǵan gıdravlıkalyq synaqtar júrgizilip jatyr. Sonyń nátıjesinde, jóndeý josparyna kiretin problemalyq aımaqtar anyqtalmaq.
Ótken jyldyń jeltoqsan aıynan bastap jóndeý jobasyn qurastyrý úshin mamandar aqaýlardy anyqtaýmen aınalysty. Merdiger uıym tsırkýlıatsııalyq sý qubyry ýchaskesi, altynshy qazandyq jáne úshinshi basqarý júıesindegi jumystardy qolǵa alǵan. Qazandyqtardy, qosalqy jabdyqtardy, qyzdyrý betterin, ekonomaızerlerdi, sý jylytqyshtardy jóndeý josparlanyp otyr. Barlyǵy 55 ýchaskedegi 18,9 shaqyrym jylý qubyry jóndeledi.
«Qazandyqtaǵy týrbınalyq jabdyqtarǵa jáne jylý jelileriniń problemalyq ýchaskelerine kúrdeli jóndeý jumystaryn júrgizý qarastyrylǵan. Jumys josparyna qazandyqtardy, qosalqy jabdyqtardy jóndeý, elektr bóligin qaıta qurý kiredi. Barlyq jumys kestege saı júrgizilýde. 14 mamyrdan bastap qyzmetkerler sany artady dep kútilýde. Jóndeý jumystaryna jalpy sany 500-ge jýyq adam jumyldyrylady», - deıdi jylý elektr ortalyǵyndaǵy bas ınjenerdiń orynbasary Kırıll Golota.
Shyǵys Qazaqstan oblysynyń ákimi Ermek Kósherbaev jóndeý jumystarynyń barysymen tanysyp, turǵyndardyń úılerin jylytý maýsymyna aldyn ala daıyndaý kerektigin basa aıtty.
«Qalada jańǵyrtýdan ótpegen úıler bar. Turǵyndar úılerdiń sýyq ekenin aıtyp shaǵymdandy. Biz olarǵa jylý elektr ortalyǵynda jumys júrgizilip jatqanyn kórsetýimiz kerek. Sýdy ózimiz jetkizemiz, qalǵany ózderine baılanysty. Qys mezgiline qazirden bastap daıyndalý kerek», – dedi aımaq basshysy.
Aıta keteıik, Rıdderdegi JEO 1956 jyly salynǵan. Ondaǵy keshendi jóndeý jumystaryna respýblıkalyq bıýdjetten 8 mlrd teńge bólingen.