Rıdder turǵyndarynyń jylý aqysyna tólegen 50 mln teńgesi qaıtarylady

<p>ÓSKEMEN. KAZINFORM &ndash; Shyǵys Qazaqstan oblysy Rıdder qalasy turǵyndarynyń jylý aqysy úshin artyq tólegen 50 mln teńgesi qaıtarylady.</p>

Ortalyqtandyrylǵan jylý qyzmetterin paıdalanatyn jáne jylý eseptegish quraldary joq Rıdder turǵyndaryna ótken jylytý maýsymynyń qorytyndysy boıynsha syrtqy aýanyń naqty temperatýrasyn eskere otyryp, jylý qyzmetteriniń quny qaıta esepteldi.

Bul jumysty Tabıǵı monopolııalardy retteý komıteti Shyǵys Qazaqstan oblysy boıynsha departamentiniń qyzmetkerleri 2024 jyldyń 1 tamyzyna deıin jylýmen jabdyqtaý qyzmetin kórsetken Rıdder qalasy ákimdiginiń «Sý arnasy» memlekettik kásipornymen birlesip júrgizdi.

«Sonyń nátıjesinde Rıdder qalasy boıynsha 2023-2024 jylǵy jylytý maýsymynda halyqqa qaıtarylatyn soma 50 mln 401 myń teńgeni qurady. Aıta ketý kerek, endi barlyq tutynýshy kommýnaldyq jylý eseptegish quraldaryn paıdalanýǵa aýysatyndyqtan, turǵyndar tek naqty tutynylǵan jylý energııasynyń kólemin tóleıdi jáne sáıkesinshe qaıta esepteý qajet bolmaıdy», - dep habarlady departament ókilderi.

Eske salsaq, bıyl Rıdder qalasynyń turǵyndary jaz boıy ystyq sýsyz otyr.