Rybakına, Oralbaı, Mýsın - Astanadan Parıj Olımpıadasyna kimder attandy

<p>ASTANA. KAZINFORM &ndash; Parıj Olımpıadasynyń bastalýyna 4 kún qaldy. Oǵan elimiz 92 lıtsenzııa jeńip alsa, 13-i Astana qalasyna tıesili. Lıtsenzııa alýdan Almaty qalasy birinshi orynda, Astana &ndash; ekinshi, Shymkent &ndash; úshinshi orynda tur.</p>

«Bul Olımpıadaǵa úlken daıyndyqpen, úlken jaýapkershilikpen qaradyq. Eki jyl ýaqyt boıy sportshylarymyz tyńǵylyqty daıyndaldy. Sportshylar baratyn oqý-jattyǵý jıyndary, halyqaralyq jarystar, chempıonattar men starttar – barlyǵyna Astana qalasynyń ákimdigi jaǵdaı jasady dep aıta alamyn. Bapkerlerge de nazardan tys qalǵan joq», - dedi Astana qalasynyń sportty damytý dırektsııasynyń basshysy Oljas Ákimov Astana kommýnıkatsııalar qyzmetinde.

Parıj Olımpıadasyna Astana qalasynan 12 sportshy 7 sport túrinen 13 lıtsenzııa jeńip alǵan. Onyń ishinde tennısten – 5 lıtsenzııa bar. Ásirese Elena Rybakına 2022 jyly ataqty «Ýımbldon» úlken dýlyǵa jeńimpazy atanǵan bolatyn. Ol álemdik reıtıngte 4-orynda tur, Tokıo Olımpıadasynda jartylaı fınalǵa deıin jetip, otandyq tennıs tarıhyndaǵy rekordty jańartqan. Budan bólek, bıylǵy maýsymdy tennısten óte sátti ótkizgen ıÝlııa Pýtıntseva, Aleksandr Býblık, Aleksandr Nedovesov, Aleksandr Shevchenko baq synaıdy.

Bokstan elorda qorjynynda 2 lıtsenzııa bar jáne Qazaqstan tarıhynda birinshi ret 80 jáne 92 kelidegi egiz Aıbek jáne Nurbek Oralbaılar Astana qalasynyń atynan shyǵady. Áıelder boksynan – 1 lıtsenzııa bar. Oǵan 2016 jyly álem chempıony atanǵan sportshy Valentına Halzova qatysady.

Júzýden 2 lıtsenzııa bar. Munda Ádilbek Mýsın araǵa 16 jyl salyp, 100 metrge batterflıaı jáne erkin júzýden jazǵy Olımpıada oıyndaryna qatyspaq.

Qazirgi bessaıystan 1 lıtsenzııany Elena Potapenko jeńip aldy, buǵan deıin Elena Rıo jáne Tokıo Olımpıadasyna qatysqan.

Ústel tennısinen 1 lıtsenzııa Kırıll Gerasımenko enshisinde, ol 2024 jyldyń basynda komandalyq álem chempıonatynda jaqsy óner kórsetti.

Sporttyq órmeleýden 1 lıtsenzııa bar. Jazǵy Olımpıada oıyndarynda ekinshi ret qana ótkiziletin quzǵa órmeleý sporty ózgeriske ushyrady. Tokıoda bir ǵana júlde oınatylsa, bıyl eki saıys túrinde lıtsenzııalar berildi. Ótken aıda Ámir Maımuratov Býdapeshttegi fınaldyq irikteýde joǵary nátıje kórsetip, jyldamdyq saıysynda joldama jeńip alǵan.

Sonymen birge, 8-13 qyrkúıek aralyǵynda Dúnıejúzilik kóshpendiler oıyndary ótedi. Álemniń 85 astam elinen 3 myńǵa jýyq qatysýshy sporttyń 21 túrinen qatysady dep josparlanýda. Búgingi tańda 89 memleket 5-shi Dúnıejúzilik kóshpendiler oıyndaryna qatysatynyn rastady. Ulttyq qurama komandasynyń quramynda sporttyń 21 túrinen 281 sportshy, onyń ishinde 8 sport túrinen Astana qalasynan 19 sportshy qatysady.

Budan bólek, 2025 jyldyń 7-14 aqpan kúnderi Qytaıdyń Harbın qalasynda qysqy Azııa oıyndary ótedi. Astana qalasynyń quramasynan 4 sport túrinen (konkımen júgirý, shańǵy jarysy, mánerlep syrǵanaý, short-trek) 21 sportshy qatysady dep josparlanýda.