RF SІM-i Raqymjan Qoshqarbaev jáne Grıgorıı Býlatovtyń erligi jaıynda maqala jarııalady

NUR-SULTAN. QazAqparat – 1945 jyldyń 30 sáýirinde Reıhstag ǵımaratyna shabýyl bastaldy. Onyń qasbetine alǵashqy Qyzyl týdy 150-shi atqyshtar dıvızııasynyń 674-shi atqyshtar polkiniń jaýyngerleri Raqymjan Qoshqarbaev pen Grıgorıı Býlatov ornatty, dep habarlaıdy QazAqparat Reseı Federatsııasy Syrtqy ister mınıstrliginiń Instagram jelisindegi paraqshasyna silteme jasap.

Berlınniń qaq ortasynda ornalasqan Reıhstag gıtlerlik Germanııanyń basty sımvoldarynyń biri edi. Jaý ony qorǵaýǵa jan-jaqty daıyndaldy. Ǵımaratty qorǵaýǵa tańdaýly armııa bólimsheleri jiberildi.

«Reıhstagtyń baspaldaqtarymen kóterilgen alǵashqylardyń arasynda 20 jastaǵy leıtenant Raqymjan Qoshqarbaev pen 19 jasar qyzyl áskerlik Grıgorıı Býlatov boldy. Jaýyngerler qoldaryna alqyzyl matadan jasalǵan týtuǵyr ustaǵan edi. 150-shi dıvızııanyń soǵys jýrnalyna sáıkes, saǵat 14:25-te olar «jer baýyrlap, ǵımarattyń ortalyq jetip, basty kireberistiń baspaldaǵyna qyzyl týdy tikken». Bul Reıhstagqa azat etýshi jaýyngerler tikken týlardyń alǵashqysy boldy.

Reıhstagtyń baspaldaqtarynda jelbiregen Qyzyl Tý bizdiń jaýyngerlerge kúsh berdi. 30 sáýir kúni keshke 674 jáne 756-polkterdiń negizgi kúshteri fashısterdiń shebin buzyp ótip, ǵımaratqa kirdi. Túnde leıtenant Berest, serjant Kantarııa jáne qyzyl áskerlik Egorov nemis mergenderiniń atqylaǵan oǵyna qaramaı, fashızm ordasynyń ústine Jeńis týyn ornatty. Reıhstagtyń jertóleleri men dálizderindegi qyzý shaıqas 2 mamyrǵa deıin jalǵasty» delingen RF SІM maqalasynda.

Reıhstagty alý kezinde kórsetken erligi men batyrlyǵy úshin Raqymjan Qoshqarbaev pen Grıgorıı Býlatov Qyzyl Tý ordenimen marapattaldy. Qoshqarbaevqa arnalǵan eskertkishter onyń Otany – Qazaqstannyń Aqmola oblysy men respýblıkanyń astanasy Nur-Sultan qalasynda, al Býlatovqa Kırov qalasynda ornatyldy.