Rejısser Farhat Sháripovtiń fılmi Berlınde gran-prıge ıe boldy
Qazaqstandyq fılm aıtýly baıqaýǵa Generation (balalar jáne jasóspirimder týraly fılmder) baǵdarlamasy boıynsha qatysty. Júlde fılm rejısseri Farhat Sháripovke tapsyryldy.
«Túsirilim tobyna maǵan degen senimi men eńbegi úshin alǵys aıtamyn. Odan bólek, fılmge túsken jas ártisterge erekshe rızashylyǵymdy bildiremin. Berlındegi komandaǵa jáne bizdi shaqyrǵany úshin rahmet! Baıqaýǵa qatysqanymyzǵa qýanyshtymyn!. Fılm jasóspirimder týraly jáne jasóspirimderge arnalǵan», - dep aǵynan jaryldy F. Sháripov.
Fılm kastıngke kelgen jasóspirimderdiń ashyq áńgimesi negizinde túsirildi. Farhat Sháripovtiń erkin aıtylmaıtyn jabyq taqyrypty qolǵa alýy birinshi ret emes.
Túsirilim 2020 jyldyń kúzinde Almatyda bastaldy. Basty rólderde Vıktorııa Romanova men Taır Svıntsov. Qoıýshy operator Aleksandr Plotnıkov, qoıýshy sýretshi Alekseı Shındın, al prodıýseri Dına Jumabek.
«Shema» fılmin QR Mádenıet jáne sport mınıstrliginiń tapsyrysymen ulttyq kınony qoldaý memlekettik ortalyǵynyń qatysýymen Medeor kınokampanııasy túsirdi.