Rejep Taııp Erdoǵan Qazaqstanmen yntymaqtastyqty nyǵaıtý mańyzdy ekenin jetkizdi

<p>Memleket basshysy Qasym-Jomart Toqaev Túrkııa Prezıdenti Rejep Taııp Erdoǵanmen kezdesti, dep habarlaıdy<a href="https://kaz.inform.kz/" target="_blank" rel="noopener"> Kazinform</a> Aqordanyń baspasóz qyzmetine silteme jasap.&nbsp;</p>

Memleket basshysy Túrkııa Prezıdentiniń Qazaqstanǵa saparynyń máni zor ekenin atap ótip, búgingi kezdesý eki eldiń kópjaqty qarym-qatynasyn nyǵaıtýǵa jáne Túrki álemin damytýǵa tyń serpin beretinine nazar aýdardy.

Qasym-Jomart Toqaev sammıt barysynda kótergen mańyzdy bastamalary men salmaqty oı-pikirleri úshin Rejep Taııp Erdoǵanǵa alǵys aıtty.

«Qadirli baýyrym, Atajurtqa qosh keldińiz! Túrkııa – bizdiń ejelden enshisi bir, tamyrlas týysymyz. Sondaı-aq Qazaqstannyń eń jaqyn ári senimdi strategııalyq seriktesi. Siz ózara qarym-qatynasty damytýǵa orasan zor úles qosyp kelesiz. Men ony joǵary baǵalaımyn. Aradaǵy turaqty kelissózderdiń arqasynda búginde kóptegen kelisimderimiz tabysty júzege asyrylýda. Byltyr ekijaqty taýar aınalymy 54 paıyzǵa ósip, 6,3 mıllıard dollar boldy. Osy kórsetkishti 10 mıllıard dollarǵa deıin jetkizýdi kózdep otyrmyz. Túrkııa – elimizdiń negizgi tórt saýda seriktesiniń biri. Investıtsııalyq yntymaqtastyq qarqyndy damyp keledi. Elimizde túrik kapıtalynyń úlesi bar 4300-den astam kompanııa jumys istep jatyr», – dedi Qasym-Jomart Toqaev.

Kezdesýde Qasym-Jomart Toqaev Rejep Taııp Erdoǵandy jáne túrik halqyn Túrkııanyń 100 jyldyǵymen quttyqtady. Sondaı-aq Memleket basshysy baýyrlas eldiń mereıtoıyna oraı Astanada Anadoly kóshesin, Shymkentte Túrkııa dańǵyly men saıabaǵyn jáne Almatyda Mustafa Kemal Atatúriktiń eskertkishin ashý josparlanyp otyrǵanyn aıtty. 

Foto: Aqordanyń baspasóz qyzmeti

Rejep Taııp Erdoǵan Túrki memleketteri uıymynyń mereıtoılyq sammıtin joǵary deńgeıde ótkizgeni úshin Qasym-Jomart Toqaevqa alǵys aıtyp, eki el arasyndaǵy ózara tıimdi yntymaqtastyqty nyǵaıtý mańyzdy ekenin jetkizdi

«Sammıtti tabysty ótkizýińizben quttyqtaımyn. Bıyl 6 aqpanda jer silkinisinen zardap shekken Gazıantep provıntsııasynyń Nýrdagy aýdanynda mektep salý týraly sheshimińiz úshin taǵy da alǵysymdy bildiremin. Bul mektep túrik-qazaq baýyrlastyǵynyń urpaqtan-urpaqqa jalǵasatyn sımvoldarynyń birine aınalady dep senemin. Jahandaǵy jáne aımaqtaǵy oqıǵalar Túrki áleminiń ózara tyǵyz qarym-qatynasta bolýyn talap etedi. 2021 jyly Ystanbulda ótken sammıtte biz ózgeris protsesin bastadyq ári bizdiń uıymǵa myqty ınstıtýtsıonaldyq qurylym sıpatyn berý týraly sheshim qabyldadyq. Osy ýaqyt aralyǵynda biz mańyzdy qadamdar jasadyq. Ol áli jalǵasady. Atajurtta maǵan jáne meniń delegatsııama kórsetken qurmetińiz úshin Sizge rızashylyǵymdy bildiremin», – dedi Túrkııa Prezıdenti.

Kezdesý barysynda memleketter basshylary qazaq-túrik strategııalyq seriktestiginiń qazirgi jaǵdaıy men damý perspektıvalaryn talqylady. Saıası dıalogty nyǵaıtýǵa, saýda-ekonomıkalyq, ınvestıtsııalyq, energetıkalyq, kólik-logıstıkalyq, agrarlyq jáne mádenı-gýmanıtarlyq salalardaǵy yntymaqtastyqty tereńdetýge basa mán berildi.

Prezıdentter Qazaqstan men Túrkııanyń jan-jaqty yqpaldastyǵyn jańa deńgeıge kóterýge baılanysty barlyq jaǵdaı jasalǵanyn atap ótti.

Sonymen qatar Qasym-Jomart Toqaev pen Rejep Taııp Erdoǵan halyqaralyq jáne aımaqtyq kún tártibindegi ózekti máseleler jóninde pikir almasty.