Rezervshilerdiń boıynan Abaıdyń «Tolyq adam» sıpattamasynyń belgilerin kórýge bolady – Álibek Ydyrys
«Prezıdenttik jastar kadr rezervine enýge arnalǵan baıqaý 6 kezeńnen turdy. Negizinde, baıqaýǵa daıyndalýdyń qajeti bolmady. Sebebi, krıterııler qatysýshylardyń boıynda burynnan qalyptasqan quzirettilikterine jáne jınaǵan tájirbıelerine negizdelgen. Bul negizdeme - basshylyq qyzmettegi adamnyń rııasyz tulǵasy jáne halyqpen etene jumys jasaý, ıaǵnı halyq únine qulaq asatyn, sonymen birge áleýmettik-ekonomıkalyq máselelerdi sheshý qabiletine saı jasalǵan. Sondyqtan, rezervshilerdiń boıynan uly Abaı atamyzdyń «Tolyq adam» sıpattamasynyń belgilerin kórýge bolady», - dedi Álibek Ydyrys.
Onyń aıtýynsha, Prezıdenttik kadr rezervi boıynsha qyzmetke ornalasýǵa kóptegen usynystar túsken jáne áli de túsip jatyr. Degenmen, jas rezervshi ál-Farabı atyndaǵy QazUÝ rektory Ǵalymqaıyr Mutanulynyń jeke qabyldaýynda bolyp, onyń ýnıversıtet janynan qurylǵan Bıomedıtsına ǵylymı zertteý ortalyǵynyń bashysy bolý turaly usynysyn qabyl alǵan.
«Bul qyzmet meniń osy konkýrsqa túsýdegi maqsatymnan basqasha bolǵanymen, tájirıbe jınaý úshin jáne bul sala boıynsha elimizde tuńǵysh ret ashylyp otyrǵan ortalyqtyqtyń aıaqtan turyp ketýi úshin túsken usynysty qabyl aldym. Jastarǵa oqý-praktıkalyq, ǵylymı-zertteý ortalyqtyń ashylýy kezek kúttirmeıtin másele edi. Alda bizdiń ortalyq hronomedıtsına, bıomassaj, akýpýntýra, fıtopreparattar, endokrınologııa, ımmýnologııa, profılaktıka, medıtsınalyq bıofızıka, PTsR analız jáne taǵy basqa baǵyttar boıynsha jumys jasaıdy. Bolashaqta osy ortalyqty ınstıtýt, odan ary respýblıkalyq ulttyq zertteý ortalyǵyna aınaldyrsaq degen josparymyz bar», - dedi jas rezervshi.
«Biz sekildi jastarǵa Memleket basshysy Qasym-Jomart Toqaev óziniń kemeńgerligimen «Prezıdenttik jastar kadr rezervi» atty joba usynyp, elge qyzmet etip, Qazaqstandy damytýǵa úles qosýǵa múmkindik berip otyr. Negizinde, aýyl sharýashylyǵy salasy boıynsha «Qazaqstannyń bolashaq fermerleri» dep atalatyn jobamdy qorǵap, elimizde aýyl sharýashylyǵyn damytý boıynsha óz ıdeıamdy usynǵan edim. Ekinshiden, áli de bolsa elmizdiń soltústik oblystaryn qazaqylandyrý jáne damytý boıynsha jumys jasap, sol óńirlerge basshylyq qyzmetke barý oıymda bar. Endi bes jyldan keıin ózimdi halyq jáne Prezıdent senip tapsyrǵan mindetti adaldyqpen oryndap, saıasyn jaıa bastaǵan báıterek retinde kóremin», - dedi Álibek Ydyrys.
Aıta keteıik, Álibek Ydyrys ál-Farabı atyndaǵy Qazaq ulttyq ýnıversıteti bıologııa jáne bıotehnologııa fakýlteti, bıofızıka jáne bıomedıtsına kafedrasy meńgerýshisiniń ǵylymı qyzmet jáne halyqaralyq baılanystar jónindegi orynbasary qyzmetin atqarǵan. Atalǵan joǵary oqý ornynyń aǵa oqytýshysy.
Eske sala ketsek, osydan birneshe kún buryn Aqordada Memleket basshysy Qasym-Jomart Toqaev Prezıdenttik kadr rezervine engen 300 jaspen kezdesý ótkizgen bolatyn. Jıynda Qasym-Jomart Toqaev el jastaryna úndeý joldady.