Reısterdi keshiktirgeni úshin «Eır Astana» áýekompanııasyna aıyppul salyndy

NUR-SULTAN. QazAqparat - QR Indýstrııa jáne ınfraqurylymdyq damý mınıstrliginiń Azamattyq avıatsııa komıteti reısterdiń keshigýi, jolaýshy quqyǵynyń buzylýy jáne azamattardan kóptegen ótinish túsýine baılanysty jarııalanǵan tergeýdiń nátıjesin málim etti, dep habarlaıdy QazAqparat.

Jolaýshylar arasynda rezonans týdyrǵan reıstiń keshigý derekterine baılanysty 18 shildede Komıtet tóraǵasy Talǵat Lastaev «Eır Astana» áýe kompanııasymen shuǵyl jınalys ótkizdi. Jıyn barysynda avıakompanııaǵa áýe kemelerin kommertsııalyq josparlaýdaǵy kemshilikteri kórsetilip, turaqty reısterdiń oryndalmaýyna jol bermeý týraly aıtyldy. Sonymen qatar áýe kemeleriniń jedel aýystyrylmaýy, reısterdiń keshigýi kezinde avıakompanııa qyzmetkerleri tarapynan jyldam túsindirmelik jumystardyń júrgizilmeýi syndy kemshilikteri kórsetildi.

Jınalys qorytyndysy boıynsha «Eır Astana» áýekompanııasy rezervti qamtamasyz etý úshin turaqty reıster keshiktirilgen kezde ǵana paıdalanylatyn arnaıy jeke áýe kemesin bóldi. Qazaqstandyq iri avıakompanııalardyń aktsıoneri retinde «Samuryq-Qazyna« UÁQ» AQ áýe kemelerin alýdy josparlaý jónindegi jumysty kúsheıtýi qajettiligi aıtyldy.

Sonymen qatar 21 shildede ózara is-qımyldy nyǵaıtý maqsatynda «Qazaqstannyń avıatsııalyq ákimshiligi» AQ, «Eır Astana» avıakompanııasy, Almaty jáne Oral qalalary áýejaılarynyń qatysýymen keńester ótkizildi.

16 shildege josparlanǵan Almaty - Male reısiniń uzaq keshigýine baılanysty jedel túrde eki kún ishinde tergeý júrgizildi. Onyń qorytyndysy boıynsha osy reıstiń jolaýshylary 15 saǵattan artyq ushýdy kútkendigi anyqtaldy. Reısti kútý kezinde jolaýshylarǵa «Qazaqstan Respýblıkasynyń áýe keńistigin paıdalaný jáne avıatsııa qyzmeti týraly» QR Zańynyń 86-babynyń 1-bóliginde kózdelgen qyzmetter, atap aıtqanda qonaq úıde turý boıynsha qyzmetter tıisti túrde usynylmaǵan.

Osyǵan oraı 2022 jylǵy 21 shildede avıakompanııaǵa qatysty ákimshilik is qozǵalyp, avıakompanııaǵa 1 000 AEK (1 AEK = 3 063 tg) mólsherinde aıyppul salyndy.

Osy ýaqytqa deıin Komıtetke barlyǵy 150-ge jýyq ótinish kelip tústi, olardyń árqaısysy boıynsha anyqtaý jumystary júrgizilýde. Onyń nátıjesi boıynsha qoldanystaǵy zańnamada kózdelgen tıisti is sharalar qabyldanatyn bolady.

Kodekstiń 567-babynyń 1-bóligine sáıkes, tasymaldaýshynyń Qazaqstan Respýblıkasynyń áýe keńistigin paıdalaný jáne avıatsııa qyzmeti týraly zańnamada kózdelgen tasymaldaýshynyń kinásinen nemese áýe kemesiniń kesh kelýinen, tasymaldaý marshrýtynyń ózgerýi saldarynan reıs oryndalmaǵan nemese keshikken jaǵdaıda jolaýshyǵa qyzmetter kórsetý jónindegi mindetterdi oryndamaýy nemese tıisti deńgeıde oryndamaýy kezinde 200 AEK mólsherinde aıyppul salynady. Sondaı-aq, osy baptyń birinshi tarmaǵynda kórsetilgendeı, ákimshilik jaza qoldanylǵannan keıin bir jyl ishinde qaıtalap jasalǵan is-áreketke (áreketsizdikke) 1 000 AEK mólsherinde aıyppul salynady.