Reısi keshikken áýe kompanııalarynyń jolaýshylarǵa tóleıtin aıyppuly ulǵaımaq

NUR-SULTAN. QazAqparat – Qazaqstanda reısi keshikken áýe kompanııalarynyń jolaýshylarǵa tóleıtin aıyppulyn ulǵaıtý máselesi qaralyp jatyr. Bul jaıynda Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan, dep habarlaıdy QazAqparat tilshisi.

«Qazaqstan Respýblıkasynda ushý turaqtylyǵynyń kórsetkishi 2021 jyly shamamen 82 paıyzdy qurady. Bul rette Eýropalyq odaq elderi men AQSh kórsetkishteri tıisinshe 77 jáne 80 paıyzdy quraıdy. Sonymen qatar, qoldanystaǵy zańnama áýe kompanııasynyń kinásinen reısterdiń keshigýi nemese bolmaýy kezinde usynýǵa mindetti qyzmetterdi kózdeıdi. Budan basqa, tasymaldaýshy keshiktirýdiń ár saǵaty úshin bılet qunynan 3 paıyzy mólsherinde aıyppul tóleıdi.

Bul rette, reısterdiń keshigýi kezinde jolaýshylardyń quqyqtaryn qorǵaý maqsatynda jolaýshylarǵa tólenetin aıyppul mólsherin ulǵaıtý máselesi qaralýda. Reıster keshiktirilgen kezde jolaýshylar aldyndaǵy óz mindetterin oryndamaǵan jaǵdaıda, áýe kompanııasy aıyppul túrinde ákimshilik jaýapkershilikke tartylady», - delingen Roman Sklıardyń jaýabynda.

Onyń dereginshe, 2021 jyly reıstiń keshigýi kezinde zańnamada kózdelgen qyzmetterdiń kórsetilmeýine baılanysty tasymaldaýshyny ákimshilik jaýapkershilikke tartýdyń 3 jaǵdaıy tirkeldi.

«Sonymen qatar, 2021 jyly áýe keńistiginde oryndalǵan turaqty reısterdiń sany ótken jylmen salystyrǵanda 36 paıyzǵa ósti. Bul rette oryndalǵan sýbsıdııalanatyn áýe reıster sany 4 365 reısti nemese jalpy reısterdiń 6 paıyzyn qurady», - dedi birinshi vıtse-premer.