Revaktsınatsııa koronavırýstan qanshalyqty qorǵaıdy – maman keńesi

NUR-SULTAN. QazAqparat – Búginde elimizde COVID-19-ǵa qarsy vaktsına saldyrý jáne revaktsınatsııalaý protsesi qarqyndy júrip jatyr. Sol sııaqty ekpe alýshy qandaı vaktsına saldyratynyn ózi tańdaıdy. Osy oraıda QazAqparat tilshisi qaıtadan vaktsına saldyrý ne úshin mańyzdy jáne revaktsınatsııa adamdy indetten qanshalyqty qorǵaıtynyn Nur-Sultan qalasy №2 emhanasynyń dáriger terapevti Qaldygúl Janbosynovadan surap bilgen edi.

«Búgin bizdiń emhanaǵa Spýtnık Laıt vaktsınasy ákelindi. Ol revaktsınaǵa usynylady. Jáne ony barlyq adam ala alady. Árıne, ózimizdiń QazVac pen Vero Cell vaktsınasy bar. Sondaı-aq, bizdiń mamandar 12 men 17 jas aralyǵyndaǵy jasóspirimder, júkti áıelder, bala emizetin áıelder jáne 60 jasqa tolǵan egde jastaǵy kisiler Pfizer vaktsınasyn salyp jatyr. Jalpy bizdiń emhanada vaktsına jáne revaktsınatsııa qarqyndy júrip jatyr. Vaktsına alýǵa qarapaıym halyqpen qatar sala qyzmetkerleri de keledi», - dedi Qaldygúl Janbosynova.

Mamannyń aıtýynsha, atalǵan emhanada kúnine 150-200 adam qaıta vaktsına saldyrady.

«Vaktsına alýǵa kelgen adamdardyń jıi qoıatyn suraǵy - revaktsınaǵa kez kelgen vaktsınany alýǵa bola ma? Árıne, ekpe alýshy bizde bar vaktsınanyń ishinen óz qalaǵanyn saldyra alady. Tańdaý kelýshiniń erkinde. Osy oraıda eskeretin jaıt bar. Eger patsıent Spýtnık V vaktsınasyn alǵan bolsa, onda revaktsınaǵa basqa ekpe (Spýtnık V emes) alýy kerek. Óıtkeni, Spýtnık V - vektorlyq vaktsına. Sondyqtan qaıta egýge ınaktıvtendirilgen vaktsınany alǵan jón. Ol degenimiz - Vero Cell, QazVac jáne Pfizer ekpesi», - deıdi ol.

Sondaı-aq, terapevt qandaı jaǵdaıda revaktsına jasatýǵa bolmaıtynyna qatysty keńes berdi.

Jáne revaktsınatsııa koronavırýstan qanshalyqty qorǵaıdy degen saýalǵa jaýap berdi.

«Revaktsınatsııanyń da ózindik qarsy kórsetkishteri bar. Eger adam jedel respıratorlyq vırýs ınfektsııasymen aýyryp otyrsa, qaıta vaktsına alýǵa kelgende qan qysymy joǵary bolsa, kelýshiniń ózin sezinýine qatysty basqa shaǵymdary bolsa, onda revaktsııanatsııa keıinge shegeriledi. Jáne ondaı jaǵdaıda patsıentke dárigerdiń tekserisinen ótýge keńes beriledi. Árıne, revaktsınatsııa indetten qorǵaıdy. Óıtkeni, qaıta vaktsına alǵan adamda antıdene sany kóbeıedi, al onyń sany kóbeıgen saıyn qorǵanysh kúsheıe túsedi. Vaktsına jáne rekvaktsınadan keıin keıbir adamdar ózin jaısyz sezinýi múmkin. Mysaly, álsizdik, dene qyzýynyń kóterilýi, býyndardyń aýrýy, taǵy sol sııaqty. Ol - qalypty jáne ótpeli jaǵdaı, qoryqpaý kerek», - deıdi maman.