Respýblıkanyń birqatar óńiri jylý berý maýsymyna daıyndyqty kesheýildetýde

ASTANA. 24 qyrkúıek. QazAqparat - Respýblıkanyń birqatar óńiri jylý berý maýsymyna daıyndyqty kesheýildetýde.

Bul týraly búgin Úkimet otyrysynda QR Indýstrııa jáne jańa tehnologııalar vıtse-mınıstri Baqytjan Jaqsalıev málim etti. «Tolyqtaı alǵanda jylý berý maýsymyna daıyndyq uıymshyldyqpen júrgizilýde. Buǵan qosa jylý berý kezeńiniń ótýine teris áser etýi múmkin birqatar problemaly máseleler de qalyp otyr», - dedi ol. Vıtse-mınıstrdiń atap ótýinshe, eldiń birqatar energııa kózindegi jumystar belgilengen kesteden keıin qalyp otyr. Olar: Soǵry JES, Rıdder qalasynyń JES-i, Qazatomónerkásip JES-1, Astana JES-i. Ekibastuz JES, «AlES» Aqbatys jylý kesheni boıynsha jumystar kesheýildetip júrgizilýde. Buǵan qosa Rýdnyı, Arqalyq jylý stansalarynda da josparlanǵan kúrdeli jóndeý jumystarynyń tek aǵymdyq jóndeý jumystary ǵana júrgizilgen. «Tolyqtaı alǵanda, Qazaqstan boıynsha aǵymdaǵy jylǵy jylý jelilerin jóndeý ótken jylmen salystyrǵanda birshama jaqsy júrgizilýde. Degenmen Astana, Almaty jáne Kókshetaý qalalary boıynsha jumystardyń arta qalýy baıqalady. Sonymen qatar jylý jelileriniń tozýynyń artýy jalǵasýda», - dedi B.Jaqsalıev.