Respýblıkalyq joldardyń 482 ýchaskesin sý basý qaýpi bar

NUR-SULTAN. QazAqparat – Respýblıkalyq joldardaǵy 482 ýchaskeni sý basý qaýpi bar. Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Respýblıkalyq mańyzy bar avtojoldardy daıyndaý boıynsha sý tasqynyna qarsy is-sharalar jospary bekitildi. Ortalyq jáne aımaqtyq deńgeıde jol qyzmeti ókilderinen komıssııalar quryldy. Qazirgi tańda respýblıkalyq joldardyń uzyndyǵy 25 myń shaqyrym. 1 298 kópir jáne 15 070 sý ótkizý qubyry bar. Onyń ishinde 482 qaýipti ýchaske, 739 qubyr jáne 59 kópir baqylaýǵa alyndy. 883 jol-paıdalaný tehnıkasy bekitildi. Táýlik boıy kezekshilik uıymdastyryldy. Avtojoldar men joldardaǵy ǵımarattar baqylaýǵa alyndy», - dedi mınıstr.

Onyń aıtýynsha, sý tasqyny kezeńinde jumystardy ýaqytyly uıymdastyrý úshin qazirgi tańda qajetti materıaldar 100 paıyz daıyndaldy. Sý ótkizý qubyrlarynyń tesikterin jáne kópir astyndaǵy arnalardy qardan tazartý jumystary bastaldy. Sondaı-aq, rekonstrýktsııalaý jáne kúrdeli jóndeý barysynda avtojoldardyń sý tasqyny qaýpi bar ýchaskelerinde sańylaýlardyń dıametri men sý ótkizý qubyrlarynyń sany ulǵaıtylady. Úıindiniń bıiktigin arttyrý jáne taǵy basqa sharalar esebinen tasqyn sýlardyń ótkizý qabiletin arttyrý úshin kópirler men sý ótkizý qubyrlary qosymsha ornatylady.

«Jalpy sý tasqynyna qarsy sharalardy oryndaý barysynda óńirlerdiń aýa-raıy jaǵdaıy, sondaı-aq ótken jyldardaǵy sý tasqyny kezeńiniń nátıjeleri eskeriledi. Sý tasqynyna qarsy is-sharalar respýblıkalyq mańyzy bar avtojoldardy kútip ustaýǵa bólingen qarajatpen atqarylady», - dedi Beıbit Atamqulov.