Respýblıkalyq jáne jergilikti joldardy jóndeýge 100 myńdaı jumysshy tartylady
«Memleket basshysynyń tapsyrmasyna sáıkes, bıyl avtomobıl joldarynyń 2,6 myń shaqyrymynda qozǵalys ashylady dep josparlanyp otyr», - delingen QR IIDM baspasóz qyzmetiniń habarlamasynda.
Atap aıtqanda, myna joldarda qozǵalys ashylady: «Qaraǵandy-Balqash-Qapshaǵaı», «Aqtóbe-Atyraý-Astrahan», «Taldyqorǵan-Óskemen», «Qalbataý-Maıqapshaǵaı», «Merki-Býrylbaıtal», «Úsharal-Dostyq», «Uzynaǵash-Otar», «Kókshetaý-Petropavl-Qorǵan», «Qostanaı-Denısovka».
Jalpy alǵanda, avtomobıl joldarynyń 4 myń shaqyrymynda qurylys jumystary júrgiziledi. Respýblıkalyq jáne jergilikti jol jelilerindegi jol-qurylys jumystaryna 100 myńǵa tarta adam tartylmaq. Іske asyrylyp jatqan jobalar aıasynda jumysqa jol-qurylys tehnıkasynyń 10 myń birligi, 77 usaqtaý qondyrǵysy, 57 beton jáne 87 asfalt-beton óndiretin zaýyt jumyldyrylǵan.
«Respýblıkalyq mańyzǵa ıe joldardyń tehnıkalyq jaǵdaıyn qalpyna keltirý jáne kútip ustaý úshin avtomobıl joldarynyń 1,5 myń shaqyrymy kúrdeli jáne ortasha jóndeý jumystarymen qamtylady. Bul maqsatqa 59 mlrd teńge qarastyrylǵan. Joldardy kúrdeli jóndeýden ótkizý aıasynda mańyzdy jobalardy iske asyrý jumystary jalǵastyrylady. Olardyń arasynda Batys Qazaqstan oblysyndaǵy jalpy uzyndyǵy 280 shaqyrymdy quraıtyn avtojolǵa asfalt-beton jabyndysyn tóseý jobasy bar», - dep atap ótilgen vedomstvo málimetinde.
Sonymen qatar, bıyl Almaty qalasy mańyndaǵy «Altyn orda» bazary aýdanynda avtojol ýchaskesin keńeıtý jumystary aıaqtalady.
Osylaısha, jaqsy jáne qanaǵattandyrarlyq jaǵdaıdaǵy respýblıkalyq avtojoldar úlesi bıyl 89 paıyzǵa deıin jetkizilip, І jáne ІІ sanattaǵy joldar uzyndyǵy 36 paıyzǵa deıin ulǵaıtylmaq.
Ótken jyl qorytyndylarynda avtomobıl joldarynyń 641 shaqyrymynda qozǵalys ashylǵan bolatyn.