Respýblıkalyq saılaýǵa baqylaý jónindegi qoǵamdyq komıssııa volonterlerdi jınaıdy
RSBQK músheleri Astana qalasyndaǵy fılıaldyń jumysy týraly áńgimeledi, sonyń ishinde saılaý ýchaskelerin ázirleýdegi volonterlerdiń róli jóninde aıtty. T.Lavrınenkonyń aıtýynsha, baıqaýshy buzýshylyqty ǵana tirkep otyrmaıdy, onyń aldyn alýmen jumys jasaıdy, sóıtip, demokratııany damytýǵa kómektesedi.
«Saılaýǵa deıin biz oǵan ázirliktiń uıymdastyrylýyn baqylaý úshin saılaý ýchaskelerinde bolamyz, kemshilikterdi túzeýge kómektesemiz. Biz sheteldik baıqaýshylar bizdiń kemshilikterimizdi aıtyp beredi, dep kútip otyrmaımyz», - dep málimdedi T.Lavrınenko.
Qazaqstandyq qoǵam úshin osy mańyzdy istegi búkil mindetter kólemin qamtamasyz etý úshin elordanyń ózinde 250 volonter qajet, alǵashqy ondaǵan adam qazirdiń ózinde Astana fılıalyndaǵy shtabta tirkeldi. Sonyń ishinde astanalyq joǵary oqý oryndarynyń zań fakýltetteriniń stýdentteri áleýmettik toptyń belsendi bóligi bolyp shyqty.
Eriktiler jınaý jónindegi habarlandyrý bastalǵannan beri bir kúnniń ishinde biz 25 volonterge 2 nusqaý sharasyn ótkizip, ádistemelik materıaldardy tarattyq. Volonterlerdiń arasynda stýdenttermen qatar, kásipkerler, etnomádenı úılerdiń ókilderi, qoǵamdyq jáne úkimettik emes uıymdardyń músheleri, orta jáne zeınet jasyndaǵy azamattar bar», - dedi T.Lavrınenko.
Saılaý kezinde RSBQK volonterleri arnaıy belgi taǵyp júredi, ony barlyq saılaý ýchaskeleriniń tóraǵalary biledi. 26 sáýirde volonterler shtabtarmen baılanys jasap, saılaý úderisiniń barysy týraly habarlap turady. Adamdar neǵurlym sanalylyq tanytsa, solǵurlym saılaý ashyq ótetin bolady, dep sanaıdy RSBQK tóraıymy.
RSBQK shtabynyń volonterlerdi tirkeıtin jáne olarmen nusqaý ótkizetin mekenjaıy: Astana qalasy, A.Imanov kóshesi, 50 («Qaınar» bıznes ortalyǵy), 5-qabat, 505-kabınet, telefon (8-7172) 37-31-90.