Respýblıkalyq komıssııa 321 «Bolashaq» stıpendııasyn taǵaıyndady

ASTANA. 25 jeltoqsan. QazAqparat - Búgin QR Memlekettik hatshysy Marat Tájınniń tóraǵalyǵymen ótken Shetelde kadrlardy taǵaıyndaý jónindegi respýblıkalyq komıssııa 321 «Bolashaq» stıpendııasyn taǵaıyndady. Bul týraly «Halyqaralyq baǵdarlamalar ortalyǵy» AQ-nyń prezıdenti Ǵanı Nyǵymetov málim etti.

«321 adamnyń 140-y magıstratýra baǵdarlamasy boıynsha bilim alsa, 1-eýi doktorantýrada oqıdy, al 180-i taǵylymdamadan ótedi. Elder boıynsha 138 adam Ulybrıtanııaǵa, 64-i AQSh-qa, 30-y Ońtústik Koreıaǵa, 17-si Nıderlandyǵa, 12-si Shveıtsarııaǵa barady. Qalǵan elder mynalar: Germanııa, Izraıl, Irlandııa, Italııa, Kanada, Polsha, Reseı jáne taǵy basqalar», - dedi ol.

Jalpy onyń atap ótýinshe, stıpendııaǵa úmitkerlerdiń qatary 700 adamǵa jýyqtaǵan. Al «Bolashaq» baǵdarlamasynyń stıpendııasyna ıe bolǵandardyń tizimi búgin keshke deıin bolashak.gov.kz saıtynda jaryq kóretin bolady.

Jalpy aǵymdaǵy jyly 1113 adam stıpendııa ıegeri atandy. Onyń 514-i - magıstratýrada, 15-i - doktorantýrada, bireýi aspırantýrada bilim alady. Sondaı-aq 583 adam taǵylymdama alý úshin shetelge attanǵan. 2013 jyly «Oqytý jáne tárbıeleý teorııasy men ádistemesi», «Ekonomıka. Qarjy. Býhgalterlik is jáne aýdıt», «Baǵalaý», «Pedagogıkalyq dıagnostıka, bilim sapasyn baǵalaý jáne basqarý», «Informatıka. Aqparattyq tehnologııalar men júıeler. Aqparat qaýipsizdigi. Esepteý tehnıkasy jáne baǵdarlamalyq qamtamasyz etý», «Memlekettik saıasat. Saıasattaný. Memlekettik basqarý», «Quqyq. Halyqaralyq quqyq. Básekelestik quqyǵy» syndy mamandyqtar zor suranysqa ıe bolǵan.

Esterińizge sala keteıik, baǵdarlama iske asyrylǵan kezeń ishinde 10 025 stıpendııa taǵaıyndaldy. Túlekter sany 6 myń adamdy qurady. Stıpendıattardyń qalǵan bóligi álemniń 33 elinde oqýyn jalǵastyrýda nemese taǵylymdamadan ótýde.