Respýblıkalyq dinı birlestikterdiń ókilderi qarttar úıinde boldy - Aqmola oblysy

KÓKShETAÝ. QazAqparat - Aqmola oblysy Aqqaıyń aýylyndaǵy qarttar úıiniń «Shapaǵat» ortalyǵynda QR Táýelsizdiginiń 28 jyldyǵyna arnalǵan «Táýelsiz Qazaqstan jáne onyń halqynyń rýhanı tiregi» atty respýblıkalyq dinı birlestikter ókilderi jınalysynyń taqyryptyq 4-shi otyrysy ótti, dep habarlaıdy QazAqparat tilshisi Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵyna silteme jasap.

QR Aqparat jáne qoǵamdyq damý mınıstrligi Din isteri komıtetiniń qoldaýymen konfessııaaralyq jáne órkenıetaralyq dıalogty damytý jónindegi N.Nazarbaev ortalyǵy uıymdastyrǵan sharaǵa memlekettik organdar men elimizdegi dinı birlestikterdiń, ǵylymı-sarapshy qaýymdastyqtyń jáne BAQ ókilderi qatysty.

Sharanyń bıylǵy jyldyń tamyz aıynda ótken 3-shi otyrysta elimizdegi dinı birlestikter, assambleıa ókilderi qabyldaǵan mańyzdy praktıkalyq sheshimderdiń aıasynda ótkizilgenin erekshe atap ótken jón. Osy otyrysqa qatysýshylardyń sheshimderi aıasynda «Shapaǵat» ortalyǵy, ıslam, hrıstıan jáne basqa din ókilderi ókilderiniń usynysy boıynsha, bastapqyda qazaqstandyqtardyń aǵa jáne jas býyn ókilderin biriktirirý, jas egemendi memlekettiń qalyptasý tarıhy men onyń qurylýyndaǵy eńbek ardagerleriniń irgeli úlesteri týraly pikir almasý alańy retinde anyqtalǵan bolatyn.

Din isteri komıtetiniń tóraǵasy E.Núkejanov óz sózinde sharanyń Táýelsizdik kúnin merekeleý qarsańynda ótkizý mańyzdylyǵyn atap ótti.

«Osy sharanyń búgin ótkizilip otyrǵany kezdeısoq emes, sebebi egemen memlekettiń Tuńǵysh Prezıdentimen birge qol ustasyp, jas táýelsiz memleket qurý jáne ony nyǵaıtý jolynda ereń eńbek etken aǵa býyn qazaqstandyqtar ekendigine aıryqsha kóńil aýdarý qajet.

Mundaı adamdardyń ómirlik tájirıbesi, olardyń rýhanı qundylyqtary, batyldyǵy men danalyǵy táýelsiz memlekettiń qalyptasýynyń qıyn zamanynda kórinis tapty - búginde bul tańǵajaıyp oqıǵa, ol adamdar men memlekettiń taǵdyryn bir tutasymen biriktiredi»,- dedi ol.

Konfessııaaralyq jáne órkenıetaralyq dıalogty damytý jónindegi N.Nazarbaev ortalyǵy tóraǵasynyń orynbasary R.K.Sákeev «Shapaǵat» ortalyǵynyń árbir turǵyny memleketimizdiń qalyptasýy men damýyna, onyń astanasynyń gúldenýine eleýli úles qosqanyn atap ótti.

Ásirese elimizdiń dinı qaıratkerleriniń sózderi júrekke jyly ári tereń maǵynada aıtyldy.

«Áziret Sultan» meshitiniń naıb ımamy Baqytjan Ótkelbaev tálim-tárbıe, ádep, ásirese aǵa býyn men kishi býyn arasyndaǵy qarym-qatynasqa erekshe nazar aýdardy.

Sonymen qatar, ol san ǵasyrlardan beri saqtalyp kele jatqan qazaq salt-dástúrleri, jasy kelgen qarttarǵa qurmet kórsetý, qamqorlyq pen súıispenshilik tárizdi rýhanı qundylyqtardy urpaqtan urpaqqa tabystaý mańyzdylyǵy jaıly aıtty.

Qazaqstannyń katolık jáne Evangeldik-lıýterandyq shirkeýi, Nur-Sultan qalasy Jetinshi kún adventısteri shirkeýi, Astanalyq hrıstıandyq Elýinshiler shirkeýi, Bahaı qaýymdastyǵy ókilderi Qarttar úıiniń turǵyndaryna tilekterin arnady.

Keń aýqymdy máselelerdi qarastyratyn jınalystyń dástúrli ótkiziletin is-sharalaryna qaraǵanda, bul otyrys alǵashqy ret jańa formatta – qaıyrymdylyq aktsııasy formatynda ótkizildi. Qarttar úıiniń turǵyndaryna qundy syılyqtar tabystalyp, merekelik kontsert uıymdastyryldy.

Óz kezeginde «Shapaǵat» ortalyǵynyń turǵyndary N.Nazarbaev ortalyǵyna jáne respýblıkanyń dinı qaıratkerlerine ótkizilgen kezdesý úshin, kórsetilgen yqylas úshin alǵystaryn bildirdi.

Shara Qazaqstan musylmandary dinı basqarmasy tarapynan ázirlengen merekelik dastarhanmen támamdaldy.