Respýblıkalyq bıýdjet kiristeri 16 mlrd teńgege artyq oryndaldy - Baqyt Sultanov

ASTANA. QazAqparat - Aǵymdaǵy jyldyń 1 toqsanynda respýblıkalyq bıýdjet kiristeri jospardan 16 mlrd teńgege artyq oryndaldy. Bul týraly búgin Úkimet otyrysynda 1 toqsandaǵy memlekettik bıýdjettiń atqarylýy jaıynda baıandaǵan QR Qarjy mınıstri Baqyt Sultanov aıtty, dep habarlaıdy QazAqparat tilshisi.

«Jyl basynan beri memlekettik bıýdjet profıtsıtpen atqarylýda. Ol jergilikti bıýdjetter kiristeriniń jospardan asyra oryndalýy esebinen qalyptasýda. Nátıjesinde 325,1 mlrd teńge kassalyq qaldyqtar qalyptasty. Onyń ishinde respýblıkalyq bıýdjette - 26,6 mlrd teńge, jergilikti bıýdjetterde - 298,5 mlrd teńge», - dedi Baqyt Sultanov.

Onyń dereginshe, memlekettik bıýdjettiń kiristeri eseptilik kezeńniń josparyna qaraǵanda 105,1, olardyń ishinde respýblıkalyq kirister - 100,9, jergilikti bıýdjetter - 117,1 paıyzǵa asyra oryndaldy. Respýblıkalyq bıýdjetke 1 781,7 mlrd teńge kirister tústi. Bul jospardan 16 mlrd teńgege, al byltyrǵy jyldyń tórt aıynyń kórsetkishinen 173 mlrd teńgege artyq. Ósý qarqyny - 110,7 paıyz.

«Jospardyń artyǵymen oryndalýy negizinen salyqtar boıynsha qalyptasty. Olardyń ishinde, ústeme tabys salyǵy - 8,5 mlrd teńge, shıki munaıǵa salynatyn eksporttyq keden baj salyǵy - 32,1 mlrd teńge. Biraq, jyl basynan beri korporatıvtik tabys salyǵy boıynsha jospardyń oryndalmaý tendentsııasy jalǵasýda. Esepti kezeńde jospar 43 mlrd teńgege oryndalmady. Basty sebebi - bank sektorynan túsimderdiń azaıýy  jáne birqatar salyq tóleýshilerdiń ótken kezeńderde artyq tóleý esebinen salyqtar tólemeýi. Osy aıtylǵan sebepterdi eskere otyryp, naqtylanǵan respýblıkalyq bıýdjette korporatıvtik tabys salyǵynyń jyldyq jospary 63 mlrd teńgege azaıtylǵan bolatyn», - dedi Baqyt Sultanov.

Mınıstrdiń aıtýynsha, jergilikti bıýdjetterdiń kiristeri 106 mlrd teńgege artyǵymen oryndalyp, 728 mlrd teńgeni qurady. Asyra oryndalǵan somanyń 77 mlrd teńgesi jergilikti salyqtarǵa tıesili. Barlyq óńirlerde kiristerdiń jospary artyǵymen oryndaldy.