Respýblıkalyq án baıqaýynda jeńgen aýyl muǵalimi: Adamdy jetistikke jeteleıtin – nıet pen eńbek
- Áńgimemizdi ánshilik qabiletti boıyńyzdan qashan baıqaǵanyńyzdan bastasaq?
- Bala kúnnen beri án aıtqandy jaqsy kóretinmin. Mekteptegi kontsertterde únemi án shyrqap júrdim. Biraq, eshqashan vokalmen kásibı túrde aınalysqan emespin. Jasóspirim shaqta daýsym ózgere bastady. Burynǵydaı ándi naqyshyna keltirip oryndaı almaıtyn boldym. Sóıtip, ánshi bolamyn degen oıymnan aınyp qaldym. Mýzykadan bólek, sportpen aınalysqandy jaqsy kóretinmin. Aǵama erip, erkin kúreske qatysqanym bar. 7-synyptan bastap áli kúnge deıin voleıbolmen shuǵyldanamyn. Osylaısha, mektep bitirgen soń dene shynyqtyrý pániniń muǵalimi bolamyn dep sheshtim.
Stýdent kezimde kúndelikti qajettilikterge aqsha jetispegendikten, qosymsha jumys izdeı bastadym. Qolyma qaıta mıkrofon alyp, Óskemendegi meıramhanalarda óner kórsetip júrdim. Biraq, dıplom alǵannan keıin ánshilikti taǵy da tastap, kindik qanym tamǵan Úlken Naryn aýylyndaǵy mektepke jumysqa ornalastym.
- Respýblıkalyq «X-Factor» jobasyna qatysýyńyzǵa ne sebep boldy?
- Ánshilikke qaıtadan byltyr bet burdym. Karaoke boıynsha Qazaqstan chempıonaty ótetinin estip, baǵymdy synap kóreıin dedim. Sonda grand-fınalǵa deıin jettim. Kóp uzamaı maǵan baıqaýdyń Norvegııada ótetin halyqaralyq kezeńine barýǵa usynys jasaldy. Biraq, jol shyǵynyn óziń kóteredi ekensiń. Ne de bolsa qatysamyn dep sheship, demeýshiler izdeýge kóshtim. Sol aralyqta vıza alý úshin Almatyǵa keldim. Ol kezde qalada «H-faktor» jobasynyń irikteý kezeńi endi ótip jatqan. Ony da kóreıin dedim. Mádı Syzdyqovtyń repertýaryndaǵy «Saǵyndym» ánin aıtyp, qazylardyń synynan óttim. Aqsha tabylmaǵandyqtan, Norvegııaǵa bara almadym. Biraq, «Ár istiń qaıyry bar» demekshi, eger shetelge ketsem bálkim osyndaı jetistikke jetpes edim.
Baıqaýdyń ekinshi kezeńinde 15 adamnyń tek beseýi ǵana qalatyny aıtyldy. Sol bestiktiń qataryna men ótpeı qalyppyn. Zattarymdy jınastyryp, aýylǵa qaıtyp kettim. Jańa oqý jyly da bastalyp jatty. Keıin joba uıymdastyrýshylary 1-kezeńde óner kórsetkenderdiń birine «Kórermen kózaıymy» júldesi berilip, qaıta shaqyrylatynyn habarlady. Ony qazylar alqasy emes, halyq daýys berý arqyly sheshedi eken. Sóıtip, men 4 600 daýys alyp, jobaǵa qaıta oraldym.
Grand-fınalǵa shyqqan soń daıyndyqty kúsheıtip, tynbaı eńbektendim. Osy ýaqyt ishinde ózimniń qanshalyqty damı túskenimdi, qalaı ózgergenimdi sezdim. Ánshilik qabiletim oıanyp, ózime degen senimdilik artty. Bul rette, tálimgerim Nurbergen Mahambetovke erekshe alǵys aıtqym keledi.
Jobada jeńimpaz atanǵanymdy estigende qýanyshymda shek bolǵan joq. Múlde sene almaı, sol jerde ne aıtqanymdy da umytyp qaldym. Áli de bári túsim sekildi. Utqan 5 mln teńgeni án jazýǵa, jeke albom shyǵarýǵa jáne aýyldaǵy úıdi satyp alý úshin bankten alǵan nesıemdi jabýǵa jumsaımyn.
- Osy án baıqaýynda jaqyndaryńyzdyń, jerlesterińizdiń qoldaýyn qalaı sezindińiz?
- Otbasymnyń, týǵan-týystarymnyń, dostarymnyń, áriptesterim men barsha jerlesterimniń qoldaýy erekshe boldy. Áleýmettik jelide qanshama post jazylyp, talaı fleshmob uıymdastyrylyp, aýdan kóshelerine bannerler men bılbordtar ornatyldy. Aýdan ákimdigi zor qoldaý tanytty. Oqýshylarym da habarlasyp: «Sáttilik, aǵa! Jeńisińizdi tileımiz!» - dedi. Sol úshin barshańyzǵa shyn júrekten rahmet aıtqym keledi!
- Aldaǵy ýaqytta taǵy osyndaı án dodasyna qatysqyńyz kele me?
- Iá, árıne. Osymen toqtamaı ózimdi taǵy kórsetkim keledi. Endi basqa elderge baryp, baq synasam deımin. Aldaǵy ýaqytta «Azııa daýysy» men «Slavıan bazary» baıqaýlaryna qatysýdy josparlap otyrmyn.
- Mýzykadan bólek basqa qandaı qyzyǵýshylyqtaryńyz bar?
- Tamaq pisirgen unaıdy. Anam aspaz bolyp jumys isteıdi. Bala kezden túrli tamaq jasaýdy úırendim. Odan keıin dostarymmen birge fýtbol oınaǵandy jaqsy kóremin.
- Ata-anańyz qandaı tárbıe berdi? Olar kóbinese qandaı aqyl aıtatyn?
- Úıdiń kenjesi bolǵandyqtan, erke bolyp óstim. Áke-sheshem únemi maǵan tańdaý quqyǵyn beretin. Árdaıym qoldaý kórsetip, tileýimdi tileıtin. Adamgershilikten attamaı, ózgege qolyńnan kelgenshe kómektesip júrý kerektigin sanama quıdy. Baǵyp-qaǵyp, osy kúnge jetkizgen ata-anama óle-ólgenshe qaryzdarmyn!
- Osy jeńisińiz arqyly aýyldaǵy talanty bar adamnyń bıik belesti baǵyndyra alatynyn dáleldep, ózgelerge motıvatsııa syıladyńyz. Sahnaǵa shyǵýǵa qorqyp júrgen jas talanttarǵa qandaı aqyl-keńes aıtar edińiz?
- Adamdy jetistikke jeteleıtin – nıet pen eńbek. Eń áýeli osy ekeýi kerek. Aýylda ne qalada tursań da, talantyń bolsa alynbaıtyn qamal joq. Kúni keshe «X-Factor» jobasynyń alǵashqy kezeńinen ǵana ótetin shyǵarmyn» dep qatysyp kóre salǵan men búgin jeńimpaz atanyp otyrmyn. Halyqtyń qoldaýyn, qoshemetin kórgen soń ózińe degen senimdilik odan saıyn artyp, baǵytyńnyń durystyǵyn, qolyńnan keletinin sezedi ekensiń. Sol úshin jastarǵa eshteńeden qoryqpaı, amal qylý kerektigin aıtqym keledi.
- Áńgimeńizge kóp rahmet!