ORAL. QazAqparat - Almaty oblysy, Jambyl aýdany Uzynaǵash aýylynda jyr alyby Jambyldyń nemeresi, Qazaqstan halyq aqyny Álimqul Jambylovtyń 90 jyldyǵyna arnalǵan respýblıkalyq aqyndar aıtysy ótti, dep habarlaıdy «QazAqparat» tilshisi.
«Rýhanı jańǵyrý» baǵdarlamasy aıasynda uıymdastyrylǵan aıtýly dodaǵa barlyǵy on aqyn qatysyp, baq synady.
Aıtys qorytyndysynda bas júldeni (1 mln teńge) Jambyl aýdanynyń ókili Jalǵas Sadyr jeńip aldy. Jandarbek Bulǵaqov - birinshi (700 myń teńge), Aınur Tursynbaeva - ekinshi (600 myń teńge), batysqazaqstandyq Talǵat Myqı (500 myń teńge) úshinshi orynǵa ıe boldy.
Bir aınalymnan turǵan saıysta Talǵat Myqı belgili aıtysker Sara Toqtamysovamen sahnaǵa shyqty.
Aıta keteıik, bul Talǵat Myqıdyń respýblıkalyq aıtystaǵy birinshi júldesi emes. Oraldaǵy Qadyr Myrza Álı atyndaǵy mádenıet jáne óner ortalyǵynda qyzmet atqaratyn Talǵat sonymen qatar jazba aqyndyǵymen de tanylyp keledi.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).