Respýblıkalyq olımpıada. Qaı aýyldyń oqýshylary jeńimpaz atandy

<p>ASTANA. KAZINFORM — Aýyl mektepteriniń oqýshylaryna arnalǵan qoǵamdyq-gýmanıtarlyq baǵyttaǵy II respýblıkalyq olımpıadanyń jeńimpazdary anyqtaldy, dep habarlaıdy Oqý-aǵartý mınıstrligi.</p>

Astanada aýyl mektepteriniń oqýshylaryna arnalǵan qoǵamdyq-gýmanıtarlyq baǵyttaǵy II respýblıkalyq olımpıadanyń qorytyndysy shyǵaryldy. Qorytyndy kezeńge Qazaqstannyń túkpir-túkpirindegi aýyldardan 450 oqýshy qatysty. Úsh kúnge sozylǵan bilim saıysynyń nátıjesi boıynsha eń joǵary baǵaǵa qol jetkizgen 197 oqýshy júldeger atandy, olarǵa 36 — altyn, 65 — kúmis, 96 — qola medal tabystaldy.

— Qazaq tilinde oqytatyn mektepter arasynda orys tili páninen olımpıadaǵa qatystym. Olımpıada arqyly óz bilimimdi synap qana qoımaı, Qazaqstannyń ár óńirinen kelgen ózim qatarly balalarmen tanysyp, dostastym. Bul — aýyl oqýshylaryna ózderin synaýǵa, tájirıbe jınaýǵa jáne respýblıkalyq deńgeıdegi jarystardyń qalaı ótetinin kórýge tamasha múmkindik dep oılaımyn. Osyndaı múmkindik syılaǵan memleketimizge, oqý-aǵartý mınıstrligine jáne barlyq uıymdastyrýshylarǵa alǵysymdy bildiremin, — deıdi Shyǵys Qazaqstan oblysy Marqakól aýdanynyń 11-synyp oqýshysy Ernııaz Erlanuly.

Foto: Oqý-aǵartý mınıstrligi

«Úzdik olımpıadalyq komanda» nomınatsııasy boıynsha I dárejeli dıplommen Almaty oblysynyń qurama komandasy marapattaldy. II dárejeli dıplom Túrkistan, Atyraý jáne Mańǵystaý oblystarynyń komandalaryna, III dárejeli dıplom Qyzylorda, Soltústik Qazaqstan, Qostanaı jáne Batys Qazaqstan oblystarynyń komandalaryna berildi. 

Jeti jeńimpaz eldiń jetekshi joǵary oqý oryndarynyń rektorlyq granttaryna ıe boldy (SDU — 4, Halyqaralyq Q.A. ıAsaýı ýnıversıteti — 3).

Eske sala keteıik, Respýblıkalyq olımpıada 13 pán boıynsha úsh kezeńde ótkizilip keledi. Bıyl mektepishilik kezeńge 99 264 oqýshy qatysyp, olardyń 53 593-i aýdandyq deńgeıge ótti. Oblystyq kezeńde 12 000 oqýshy baq synasa, fınaldyq kezeńge 1 000-ǵa jýyq oqýshy irikteldi. Qoǵamdyq-gýmanıtarlyq baǵytta 450, al jaratylystaný-matematıka baǵytynda 486 oqýshy bilim básekesine tústi. Barlyǵy eki baǵyt boıynsha 418 júldeger anyqtaldy. Aqtyq kezeńge qatysýshy 940 oqýshynyń barlyǵy bolashaq ıntellektýaldyq jarystarǵa daıyndalý maqsatynda «Daryn» respýblıkalyq syrttaı mektebine qabyldandy. Al I dárejeli dıplom ıegerleri 2025 jyldyń naýryzynda ótetin jalpy bilim beretin pánder boıynsha respýblıkalyq olımpıadanyń sońǵy kezeńine qatysa alady.

Buǵan deıin habarlaǵanymyzdaı, qazaqstandyq oqýshylar 2025 jyly Londonda ótetin Halyqaralyq tarıh olımpıadasyna qatysady.