Respýblıkalyq 3 qala men 12 oblys jergilikti ýaqytty 1 saǵatqa artqa aýystyrady

<p>2024 jyldyń 29 aqpanynan 1 naýryzǵa qaraǵan túni respýblıkalyq 3 qala men 12 oblys aýmaǵynda jergilikti ýaqyt 1 saǵatqa artqa aýystyrylady. Bul jaıynda ashyq NQA-da jarııalanǵan Úkimet qaýlysynyń jobasynda aıtylǵan, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Qujatta Qazaqstan Respýblıkasy aýmaǵynda ýaqyt esepteý Qazaqstan Respýblıkasynyń ýaqyt pen jıilik memlekettik alǵashqy etalony udaıy júrgizetin, saqtaıtyn ári beretin saǵattyq beldeýlerdiń halyqaralyq júıesi boıynsha júrgiziletindigi, elimizdiń búkil aýmaǵynda 5-shi saǵattyq beldeý qoldanylatyndyǵy aıtylǵan.

«Astana, Almaty, Shymkent qalalarynyń, Abaı, Aqmola, Almaty, Jambyl, Jetisý, Qaraǵandy, Qostanaı, Pavlodar, Soltústik Qazaqstan, Túrkistan, Ulytaý, Shyǵys Qazaqstan oblystarynyń ákimdikteri 2024 jylǵy 29 aqpannan 2024 jylǵy 01 naýryzǵa qaraǵan túni (saǵat 00:00-de) jergilikti ýaqytty 1 saǵatqa artqa aýystyrsyn», - delingen qaýly jobasynda.

Aıta keteıik, Qazaqstan Respýblıkasynda eki ýaqyt beldeýi (UTC+5, UTC+6) qoldanylady. Atyraý, Batys Qazaqstan, Mańǵystaý, Aqtóbe jáne Qyzylorda oblystary – 4-shi saǵattyq beldeýinde (UTC+4+1). Astana, Almaty, Shymkent qalalary jáne qalǵan oblystar (Qostanaı, Soltústik Qazaqstan, Aqmola, Qaraǵandy, Ulytaý, Túrkistan, Jambyl, Pavlodar, Shyǵys Qazaqstan, Abaı, Jetisý, Almaty) 5-shi saǵattyq beldeýine (UTC+5+1) jatady.

Bul rette, búgingi kúni Qazaqstan Respýblıkasy azamattarynyń edáýir bóligi (Qostanaı, Aqmola, Soltústik Qazaqstan, Qaraǵandy, Pavlodar, Almaty, Túrkistan, Jambyl, Ulytaý, Jetisý jáne Abaı oblystarynyń, Astana jáne Almaty, Shymkent qalalarynyń turǵyndary) óziniń geografııalyq ýaqytynan ozyp – UTC+6 ákimshilik ýaqyt beldeýi boıynsha ómir súredi. Aýmaqtyq kórsetilgen aımaqtar UTC + 5 ýaqyt beldeýinde ornalasqan.

Adamnyń densaýlyǵy, ekonomıkasy jáne qaýipsizdigi úshin kún (tabıǵı) ýaqytyna múmkindiginshe jaqyn turaqty ýaqyt beldeýlerin paıdalaný qajet. Osyǵan baılanysty, jekelegen azamattar, qoǵam belsendileri, Qazaqstan Respýblıkasy Parlamentiniń depýtattary Qazaqstan Respýblıkasynda, onyń ishinde Qyzylorda, Qostanaı, Batys Qazaqstan oblystary úshin ýaqytty esepteý máselelerin kóterip otyrdy. Ozyq ýaqytty qoldaný birqatar aýrýdyń órshýine yqpal etedi jáne faktorlardyń biri bolyp tabylady. Eń aldymen, sharshaýdyń jınaqtalýynda, aqyl-oı jáne fızıkalyq jumysqa qabilettiliktiń tómendeýinde, uıqynyń buzylýynda, as qorytýdyń buzylýynda jáne t.b. kórsetilgen desınhronozdy atap ótken jón.