Respýblıkadaǵy jańa kadrlyq taǵaıyndaýlar
Atap aıtqanda, Elbasy Nursultan Nazarbaev elimizdiń Ekonomıkalyq jáne sybaılas jemqorlyqpen kúres agenttiginiń basshylyq quramyn ózgertti. Andreı Ivanovıch Lýkın atalǵan agenttik tóraǵasynyń birinshi orynbasary bolyp taǵaıyndaldy. Sonymen qatar Qarjy polıtsııasy basshysynyń orynbasary qyzmetine QR Bas prokýratýrasy Quqyqtyq statıstıka jáne arnaıy esepter komıtetiniń burynǵy basshysy Marat Muratuly Ahmetjanov pen Aıbar Jırensheuly Bodanov keldi.
A.Lýkın 1961 jyly dúnıege kelgen. Tselınograd ınjenerlik-qurylys ınstıtýtyn, Qaraǵandy memlekettik ýnıversıtetin bitirgen. Astana qalalyq turǵyn úı departamentiniń basshysy, QR Indýstrııa jáne saýda vıtse-mınıstri qyzmetterin atqarǵan. 2005 jyldyń sáýirinen Qarjy polıtsııasy tóraǵasynyń orynbasary bolǵan.
Al onyń áriptesi M.Ahmetjanov 1964 jyly dúnıege kelgen. Qaraǵandy memlekettik ýnıversıtetin bitirgen. 3-synypty memlekettik keńesshi dárejesi bar. Qaraǵandy oblystyq prokýratýra organdarynda, Bas prokýratýrada qyzmet etip, Іshki ister mınıstrligi, Ádilet mınıstrligi júıelerinde basshylyq laýazymda bolǵan. Sonymen qatar Pavlodar jáne Ońtústik Qazaqstan oblystarynyń prokýrory qyzmetin atqardy.
Al A.Bodanov 1962 jyly dúnıege kelgen. KSRO AShM Jambyl gıdromelıoratıvti qurylys ınstıtýtyn, QR MTK Qaraǵandy joǵary mektebin bitirgen. Eibek jolyn qurylys salasynan bastaǵan ol keıin kúsh-qurylym organdaryna aýysqan. Jańa qyzmetke taǵaıyndalǵanǵa deıin Almaty oblystyq qarjy departamentiniń bastyǵy boldy.
Sonymen qatar buqaralyq aqparat quraldary máselelerine jetekshilik jasaıtyn QR Mádenıet jáne aqparat mınıstrliginiń Aqparat jáne muraǵat komıtetine de jańa basshy taǵaıyndaldy. Bul qyzmetke QR Prezıdenti Ákimshiligi ishki saıasat bóliminiń sektor meńgerýshisi bolǵan Bolat Qalııanbekov jaıǵasty. Al komıtettiń burynǵy tóraǵasy Bolat Bersebaev QR Prezıdenti Ákimshiligine aýysýyna baılanysty laýazymynan bosatyldy.
Osy apta ishinde sondaı-aq elimizdiń birqatar ulttyq kompanııalarynda da kadrlyq aýys-túıis oryn alyp, «QazMunaıGaz» UK» AQ tóraǵasynyń túrli baǵyttarǵa jetekshilik jasaıtyn orynbasarlary qyzmetterine kiristi. Atap aıtqanda Danııar Berlibaev (korporatıvtik damý), Qurmanǵazy Isqazıev (geologııa jáne perspektıvaly jobalar), Tımýr Bımaǵambetov (óndirý jáne tenıkalyq damý), Nurtas Shmanov (kólik ınfraqurylymy), Danııar Tıesov (munaı qaıta óńdeý jáne munaı hımııasy), Maǵzum Myrzaǵalıev (ınnovatsııalyq damý jáne servsıtik jobalar) jańa laýazymǵa taǵaıyndaldy.
«Samuryq-Energo» energetıkalyq ulttyq kompanııasynyń da basshylyq quramynda ózgerister oryn aldy. Aktsıonerlik qoǵamnyń Dırektorlar keńesi Serik Keńesbekuly Ospanovtyń kandıdatýrasyn basqarma tóraǵasynyń birinshi orynbasary, al Gúlbaný Tájibaıqyzy Pazylhaıyrovany orynbasar laýazymyna bekitti. Kompanııada sondaı-aq 5 jańa basqarýshy dırektor bekitilip, qoǵam basqarmasynyń 5 múshesi saılandy.
Óńirlerde birqatar oblystardyń ákimderi óz orynbasarlaryn aýystyrdy. Apta basynda Qostanaı oblysynyń ákimi Nuraly Sádýaqasov birqatar kadrlyq taǵaıyndaýlar jasady. Ol óziniń orynbasaryn jáne Qostanaı qalasy men Meńdiqara, Áýlıekól aýdandarynyń basshylaryn aýystyrdy.
Naqty aıtqanda, oblys ákiminiń orynbasary bolyp Bazyl Shamuhanuly Jaqypov taǵaıyndaldy. Ol 1965 jyly dúnıege kelgen. Tselınograd aýyl sharýashylyǵy ınstıtýtyn, Almaty ekonomıka jáne statıstıka akademııasyn bitirgen. Ár jyldary atalǵan oblystyń memlekettik organdarynda basshylyq qyzmette bolǵan. Jańa laýazymǵa taǵaıyndalǵanǵa deıin Meńdiqara aýdanynyń ákimi bolyp istedi.
Al oblys ákiminiń burynǵy orynbasary Nıkolaı Denıng Meńdiqara aýdanynyń ákimi bolyp ketti. Ol da Tselınograd aýyl sharýashylyǵy ınstıtýtyn bitirip, Aqmola men Qostanaı oblystarynda ártúrli laýazymdy qyzmetter atqarǵan.
Qostanaı qalasynyń ákimi qyzmetine Ǵaýez Torsanuly Nurmuhambetov kiristi. Tselınograd aýyl sharýashylyǵy ınstıtýtyn, Chelıabi memlekettik ýnıversıtetin, M.Dýlatov atyndaǵy Qostanaı ınjenerlik-ekonomıkalyq ýnıversıtetin támamdaǵan onyń ekonomıka ǵylymynyń kandıdaty dárejesi bar. Jańa qyzmetke taǵaıyndalǵanǵa deıin Áýlıekól aýdanynyń ákimi boldy.
Al Qostanaı qalasynyń ákimi bolǵan Jomart Mırasuly Nurǵalıev Áýlıekól aýdanynyń áleýetin kóterýge attandy. Qostanaı pedagogıkalyq ınstıtýtyn bitirgen ol partııalyq, memlekettik organdardyń laýazymdy qyzmetterin atqardy. 2008 jyldyń aqpanynan qala ákimi qyzmetinde bolǵan edi.
Osy aptada «Bolashaq» prezıdenttik stıpendııasynyń túlegi Anýar Ahmetjanov Qaraǵandy oblysy ákiminiń orynbasary bolyp taǵaıyndaldy. Buǵan deıin «QazGerMunaı» kompanııasynda basshylyq qyzmette bolǵan ol endi óńirdiń ónerkásiptik jáne qarjy-ekonomıkalyq máselerimen bel sheshe aınalyspaq.
QR Indýstrııa jáne jańa tehnologııalar burynǵy vıtse-mınıstri Dúısenbaı Turǵanov Pavlodar oblysy ákiminiń birinshi orynbasary bolyp ketti. 1959 jyly dúnıege kelgen ol Almaty energetıkalyq ınstıtýtyn ári Máskeýdegi Búkilodaqtyq qarjy-ekonomıkalyq ınstıtýtyn támamdaǵan. Jańa qyzmetke taǵaıyndalǵanǵa deıin «Samuryq-Energo» AQ Basqarmasy tóraǵasynyń birinshi orynbasary boldy.
Juma kúni Jezqazǵan men Sátbaev qalalaryna jumys saparymen barǵan Qaraǵandy oblysynyń ákimi Ábilǵazy Qusaıynov eki qalanyń basshylaryn da aýystyrdy. Sonymen osy ýaqytqa deıin Sátbaev qalasyn basqarǵan Baýyrjan Shyńǵysov Jezqazǵan qalasynyń ákimi bolyp taǵaıyndaldy. Al Sátbaev qalasynyń salyq basqarmasyn basqarǵan Batyrlan Ahmetov endi ákim qyzmetiniń dámin tatpaq. Al Jezqazǵan qalasynyń burynǵy ákimi Berik Ábdiǵalıuly QR Premer-Mınıstri birinshi orynbasarynyń keńesshisi bolyp bekitildi.
Aıta keteıik, 1964 jyly dúnıege kelgen B.Shyńǵysov Qaraǵandy polıtehnıkalyq ınstıtýtyn jáne E.Bóketov atyndaǵy Qaraǵandy memlekettik ýnıversıtetin bitirgen.
Al B.Ahmetov 1969 jyly dúnıege kelgen. Qaraǵandy polıtehnıkalyq ınstıtýtyn, Qazaq memlekettik basqarý akedemııasy janyndaǵy Naryq ınstıtýtyn, E.Bóketov atyndaǵy Qaraǵandy memlekettik ýnıversıtetin bitirgen.
Aqtóbe oblysynyń ákimi Arhımed Muhambetov 33 jastaǵy Erhan Omarovty oblys ortalyǵynyń basshysy qyzmetine taǵaıyndaý týraly buıryqqa qol qoıdy. Ol Aqtóbe qalasy ákiminiń orynbasary, oblys ákiminiń orynbasary bolǵan. 2012 jyldyń qańtarynan Aqtóbe oblysy ákiminiń birinshi orynbasary qyzmetin atqarǵan. Al qala ákimi Nurmuhambet Ábdibekov oblys ákiminiń birinshi orynbasary bolyp joǵarylady.
Apta sońynda QR Bilim jáne ǵylym mınıstri Baqytjan Jumaǵulov birqatar memlekettik joǵary oqý oryndarynyń rektorlaryn taǵaıyndady. Atap aıtqanda Serik Máýlenuly Ómirbaev S.Toraıǵyrov atyndaǵy Pavlodar memlekettik ýnıversıtetine, Beıbit Baımaǵambetuly Mamyraev H.Dosmuhamedov atyndaǵy Atyraý memlekettik ýnıversıtetine, M.Áýezov atyndaǵy Ońtústik Qazaqstan memlekettik ýnıversıtetine Jumahan Úshkempiruly Myrhalyqov rektor bolyp bardy.
S.Ómirbaev Bilim jáne ǵylym mınıstrligi salasynda 10 jyldan astam ýaqyt istep, Damý strategııasy, Joǵarǵy jáne JOO-dan keıingi bilim berý departamentterin basqarǵan. Al B.Mamyraev jańa qyzmetke taǵaıyndalǵanǵa deıin S.Amanjolov atyndaǵy Shyǵys Qazaqstan memlekettik ýnıversıtetiniń rektory bolǵan. Bilim jáne ǵylym salasyndaǵy birqatar halyqaralyq jobalarǵa qatysyp, ári ony ázirleýshilerdiń biri bolǵan A.Myrhalyqov buǵan deıin atalǵan JOO-nyń ınnovatsııalyq qyzmet jónindegi prorektory qyzmetin atqarǵan.
Sonymen qatar QR BǴM basshysy Semeı memlekettik pedagogıkalyq ınstıtýtynyń rektory mindetin ýaqytsha atqarýshy retinde Maqtaǵalı Ábdimájıtuly Bektemisovti, al S.Amanjolov atyndaǵy Shyǵys Qazaqstan memlekettik ýnıversıtetine Meıir Ǵarıfollauly Eskendirovti bekitti.