Respýblıka sottarynda áleýmettik zertteý júrgizilýde

ASTANA. QazAqparat - Sot protsesine qatysýshylarynyń arasynda sot tóreliginiń júzege asyrylý sapasyna azamattardyń qanaǵattaný jáne senim bildirý deńgeıin anyqtaý maqsatynda respýblıkanyń jergilikti sottarynda aýqymdy áleýmettik saýalnamany júrgizý jalǵasýda.

Saýalnamany aǵymdaǵy jyldyń aqpan jáne sáýir aılary aralyǵynda Joǵarǵy Sot pen BUU-nyń Damý baǵdarlamasynyń tyń birlesken jobasy sheńberinde táýelsiz uıym - Quqyqtyq saıasatty zertteý ortalyǵy jasyryn saýalnamalaý arqyly júrgizýde.

Atalǵan is-shara respýblıkanyń 200 sotynda ótip, oǵan 12 000-ǵa jýyq respondent qatysady dep josparlanýda.

Búgingi tańdaǵy málimet boıynsha saýalnamany júrgizý Almaty, Aqtóbe, Batys Qazaqstan, Qostanaı, Qyzylorda, Mańǵystaý jáne Soltústik Qazaqstan oblastarynyń sottarynda aıaqtaldy. Bul aımaqtarda barlyǵy 7 000-nan astam sot protsesine qatysýshyǵa suraý salyndy.

Zertteýdiń qorytyndylary osy jyldyń shilde aıynda shyǵarylyp, aǵymdaǵy jyldyń jartyjyldyq qorytyndysy boıynsha ótkiziletin sýdıalardyń keńeıtilgen keńesinde tanystyrylady dep josparlanýda.