Respýblıka kúnine oraı Jetisýda áleýmettik mańyzy bar birneshe nysan el ıgiligine berildi
Olardyń qatarynda medıtsınalyq pýnktter, sport alańdary, halyqqa memlekettik qyzmet kórsetetin tsıfrlyq keńse de bar. Sol sııaqty aýyl turǵyndaryna kógildir otyn berildi.
Atap aıtqanda, Kóksý aýdanynda mereke qarsańynda ıgi jańalyqtar kóp boldy.
Máselen, Jambyl aýylynda bir jarym aıdyń ishinde blokty-modýldi panelderden salynǵan jańa medıtsınalyq pýnkt iske qosyldy. Nysan tolyq jabdyqtalǵan, onda feldsher men akýsherler kabıneti, protsedýra jáne egý bólmeleri, fıltr, medıtsınalyq qaldyqtardy jınaqtap, saqtaıtyn oryn bar.
Al Zylıha Tamshybaı aýylyna kópten kútken gaz jetkizildi. Endi kógildir otynnyń ıgiligin mundaǵy 400 otbasy kóre alady. Oǵan qosa Terekti aýylynyń balalary úshin quny 22 mln teńgeden asatyn sporttyq oıyn alańy paıdalanýǵa berildi.
Sondaı-aq, Úshtóbe qalasynda Respýblıka kúnine oraı 30 páterli baspananyń kiltteri tabystaldy. Saltanatty sharaǵa aýdan ákimi Erlan Isabekov, Úshtóbe qalasynyń turǵyndary jáne merdiger mekeme ókilderi qatysty.
Turǵyn úı «Nurly jer» memlekettik baǵdarlamasy aıasynda salyndy. Úı qurylysyna 405,6 mln. teńge jumsaldy.
Jańa úıde 2 bólmeli 10 páter jáne 3 bólmeli 20 páter bar.
Qonys toı ıeleri qatarynda 20 páterge - 1 jáne 2 toptaǵy múgedekter, Aýǵan soǵysynyń ardagerleri, tolyq emes otbasylar, zeınetkerler, múgedek balalardy tárbıelep otyrǵan otbasylar sanatyndaǵy azamattar ıe boldy, taǵy 5 páter jetim balalarǵa, 5 -i kóp balaly otbasylarǵa buıyrdy.
Aýdan basshysy turǵyndardy qonys toıymen quttyqtap, aýdanda jaqyn arada 40 páterli kommýnaldyq úıdiń qurylysyn bastaý, sondaı-aq «Kókdala» shaǵyn aýdanynda 20 jańa turǵyn úı salý josparlanyp otyrǵanyn atap ótti.
Zamanaýı sport nysany Sarqan aýdany Sarqan qalasynda da ashyldy. Aqyn Sara atyndaǵy mektepte stadıon salyndy. Oǵan jergilikti bıýdjetten 59 mln teńge bólindi. Jyl sońyna deıin Sarqan aýdanynda 4 fýtbol stadıony, 8 balalar oıyn alańy, 5 vorkaýt alańy iske qosylady. Aýdanda mereke qarsańynda ashylǵan nysannyń biri – halyqqa qyzmet kórsetý ortalyǵynyń «Tsıfrlyq keńse» bólimshesi.